యువతిపై ఆటో డ్రైవర్ల అత్యాచారం: రిమాండ్ ఖైదీ మృతి

By Pratap

Published: Monday, July 22, 2013, 16:10 [IST]

హైదరాబాద్ : తూర్పు గోదావరి జిల్లా రాజమండ్రిలో దారుణంమైన సంఘటన చోటు చేసుకుంది. ఓ యువతిపై ఆటో డ్రైవర్లు సామూహిక అత్యాచారానికి పాల్పడ్డారు. విజయనగరం జిల్లా గుమ్మలక్ష్మాపురానికి చెందిన యువతిపై సామూహిక అత్యాచారం జరిపిన ఆటో డ్రైవర్లు ఆపై ఆమెను ఆర్టీసీ కాంప్లెక్స్‌లో వదిలేశారు. యువతి పరిస్థితిని గుర్తించిన స్థానికులు వెంటనే ప్రభుత్వాస్పత్రికి తరలించారు. దీనిపై పోలీసులు కేసు నమోదు చేసి విచారణ చేపట్టారు.

రైల్లో యువకుడి ఆత్మహత్యాయత్నం

కాకతీయ ప్యాసింజర్ రైలులోని బాత్రూమ్‌లో రామాచారి(23) అనే యువకుడు గొంతుకోసుకుని ఆత్మహత్యాయత్నానికి పాల్పడ్డారు. దీన్ని గుర్తించిన తోటి ప్రయాణికులు రైల్వే సిబ్బందికి ఫిర్యాదు చేయగా వెంటనే యువకుడిని గాంధీ ఆస్పత్రికి తరలించారు. అతడి పరిస్థితి ఆందోళనకరంగా ఉన్నట్లు తెలుస్తోంది.

పోలీసులు కేసు నమోదు చేసుకుని దర్యాప్తు చేస్తున్నారు. తనకు బతకాలని లేదంటూ రామాచారి రాసిన సూసైడ్ నోట్ ఘటనా స్థలంలో లభ్యమైంది. రైలు వరంగల్ నుంచి సికింద్రాబాద్‌కు వస్తుండగా ఈ ఘటన చోటు చేసుకుంది. రామాచారిని వరంగల్ జిల్లాకు చెందినవాడిగా గుర్తించారు.

రిమాండ్ ఖైదీ మృతి

వరంగల్ జిల్లాలోని సెంట్రల్ జైల్లో రిమాండ్ ఖైదీ రాములు మృతి చెందాడు. అయితే జైలు అధికారులే రాములును చంపారంటూ బంధువులు ఆందోళనకు దిగారు. దీంతో వరంగల్ - హన్మకొండ రహదారిపై వాహనాల రాకపోకలు నిలిచిపోయాయి. అయితే రాములు గుండె పోటుతో మృతి చెందాడని జైలు అధికారులు చెబుతున్నారు.

Published On July 22, 2013