జైలు వద్ద జగన్ ఫోటోకి రాఖీ, అన్నకు షర్మిల 'రక్ష'

By Srinivas

Published: Wednesday, August 21, 2013, 11:34 [IST]

హైదరాబాద్: అక్రమాస్తుల కేసులో అరెస్టై చంచల్‌గూడ జైలులో ఉన్న వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డికి రాఖీలు కట్టేందుకు పెద్ద ఎత్తున మహిళా కార్యకర్తలు బుధవారం జైలు వద్దకు వచ్చారు. వారిని జైలు అధికారులు లోనికి అనుమతించకపోవడంతో సోదరుడికి రాఖీ కట్టేందుకు వచ్చిన ఆ పార్టీ నేత షర్మిలకు, అక్కడే ఏర్పాటు చేసిన భారీ జగన్ ఫ్లెక్సీకి వారు రాఖీ కట్టారు.

ఈ రోజు రక్షాబందన్. దీంతో వైయస్సార్ కాంగ్రెసు పార్టీ కార్యకర్తలు జగన్‌కు రాఖీ కట్టేందుకు వచ్చారు. జగన్ సతీమణి భారతి కూడా జగన్‌ను కలిసేందుకు జైలుకు వచ్చారు. ఆ తర్వాత షర్మిల సోదరుడికి రాఖీ కట్టేందుకు వచ్చారు. వారు అధికారులతో మాట్లాడే అవకాశాలున్నాయి.

సిబిఐ ఎదుట హాజరైన ధర్మాన

మాజీ మంత్రి, కాంగ్రెసు పార్టీ సీనియర్ ఎమ్మెల్యే ధర్మాన ప్రసాద రావు బుధవారం ఉదయం సిబిఐ ఎదుట హాజరయ్యారు. దిల్ కుశ అతిథి గకృహంలో సిబిఐ అధికారులు ఆయనను విచారిస్తున్నారు. జగన్ కంపెనీలలో పెట్టుబడుల కేసులో విచారణకు హాజరు కావాలంటూ ధర్మానకు సిఆర్‌పిసి సెక్షన్ 160 కింద సిబిఐ నిన్న ఆయనకు సమన్లు జారీ చేసిన విషయం తెలిసిందే.

అనంతపురం జిల్లా ఇందూ కంపెనీకి సంబంధించి లేపాక్షి నాలెడ్జ్ ప్రాజెక్టుకు భూకేటాయింపుల వ్యవహారంలో ఆయనను సిబిఐ విచారిస్తోంది. కాగా, ఇప్పటికే ధర్మాన ప్రసాద రావు పైన సిబిఐ ఒక ఛార్జీషీటు దాఖలు చేసింది. ఆయన సిబిఐ ఎదుట హాజరు కావడం ఇది మూడోసారి.

Published On August 21, 2013