మైనర్ బాలిక కిడ్నాప్, అత్యాచారం: నిందితుడి అరెస్టు

హైదరాబాద్‌: రాష్ట్ర రాజధాని హైదరాబాదులోని పాతబస్తీలో ఓ మైనర్ బాలికను అపహరించి, ఆమెపై అత్యాచారం చేసిన నిందితుడు సులేమాన్ బిన్ హుస్సేన్‌ను అరెస్టు చేశారు. శాలింబడం పోలీసు ఇన్‌స్పెక్టర్ మహేశ్వర్ బుధవారం ఈ విషయం చెప్పారు. కిడ్నాప్, అత్యాచారం, తదితర కేసులను అతనిపై పెట్టినట్లు తెలిపారు. ఆ తర్వాత అతన్ని జ్యుడిషియల్ రిమాండ్‌కు తరలించినట్లు చెప్పారు.

పోలీసుల కథనం ప్రకారం - ఈ నెల 15వ తేదీన మైనర్ బాలిక కిడ్నాప్ జరిగింది. ఆమెను కిడ్నాప్ చేసిన సులేమాన్ పాతబస్తీలోని ఓ లాడ్జీలో ఆమెపై అత్యాచారం చేశాడు. ఆ తర్వాత కర్ణాటకలోని గుల్బర్గాకు తరలించాలని భావించాడు.

ఈలోగా బాలిక అదృశ్యంపై పోలీసులకు ఫిర్యాదు అందింది. దాంతో పోలీసులు రంగంలోకి దిగి దర్యాప్తు చేపట్టారు. పలువురిని విచారించగా ఆ బాలికను ఇంటి సమీపంలో ఆడుకుంటుండగా చూశామని చెప్పారు.

బాలిక కోసం పోలీసులు ముమ్మరంగా గాలించడం ప్రారంభించారు. ఈ క్రమంలో నిందితుడు సులేమాన్‌పై అనుమానంతో అదుపులోకి తీసుకున్నట్లు తెలిపారు. పోలీసులు బాలిక తండ్రి నుంచి వాంగ్మూలం తీసుకున్నారు. ఆమెను తల్లిదండ్రులకు అప్పగించారు.

English summary

An accused has been arrested at Shalibanda in Hyderabad in sexual assault case on minor girl.