విజయ సాయిరెడ్డి కూతురికి హైకోర్టు మరో షాక్-అదీ వదలొద్దని ఆదేశం..!

వైఎస్సార్సీపీ ఎంపీ విజయసాయిరెడ్డి కుమార్తెకు హైకోర్టులో మరో ఎదురుదెబ్బ తగిలింది. గతంలో ఇచ్చిన ఓ ఆదేశం అమల్లో భాగంగా తాజాగా ఆమెకు హైకోర్టు మరో షాకిచ్చింది. వైసీపీ అధికారంలో ఉన్న సమయంలో సాయిరెడ్డి కుమార్తె నేహారెడ్డి విశాఖలో నిర్మించుకున్న ఓ కట్టడం అక్రమమని తేల్చిన హైకోర్టు...దాన్ని కూల్చేయాలని ఆదేశాలు ఇచ్చింది. అంతటితో ఆగకుండా ఇదే అంశంలో ఆమెకు మరో షాకిస్తూ తాజాగా జీవీఎంసీకి ఆదేశాలు జారీ చేసింది.

విశాఖ బీచ్ రోడ్డులో సీఆర్ఈజడ్ నిబంధనలు ఉల్లంఘించి నేహారెడ్డి నిర్మించిన ఓ కాంక్రీట్ కట్టడాన్ని జీవీఎంసీ పట్టించుకోవడం లేదని గతంలో జనసేన కార్పోరేటర్ పీతల మూర్తి యాదవ్ దాఖలు చేసిన పిటిషన్ ను విచారించన హైకోర్టు.. దాన్ని కూల్చేయాలని ఆదేశాలు ఇచ్చింది. దీంతో జీవీఎంసీ అధికారులు ఆ కట్టడాన్ని తాజాగా కూల్చేశారు. అయితే దీనిపై తదుపరి విచారణలో హైకోర్టు ఆ కూల్చివేతకు అయిన ఖర్చు కూడా నేహారెడ్డి నుంచే వసూలు చేయాలని ఆదేశాలు ఇచ్చింది. దీంతో హైకోర్టు ఆదేశాలు ఆమెకు మరో షాకిచ్చినట్లయింది.

నేహారెడ్డి అక్రమ నిర్మాణంపై హైకోర్టులో జరిగిన విచారణలో ప్రభుత్వ న్యాయవాది ఆమెకు షోకాజ్ నోటీసు ఇచ్చినట్లు తెలిపారు. దీనిపై స్పందించిన హైకోర్టు ధర్మాసనం.. ఆ నిర్మాణం కూల్చివేతతో పాటు అందుకు అయిన ఖర్చు కూడా ఆమె నుంచి వసూలు చేయాలని, ఆ వివరాలు కూడా కోర్టుకు సమర్పించాలని ఆదేశాలు ఇచ్చింది. దీంతో గతంలో ఇదే నిర్మాణాన్ని చూసీ చూడనట్లు వదిలేసి, ఆ తర్వాత కోర్టు ఆదేశాలతో కూల్చిన జీవీఎంసీ అధికారులు అందుకు తామే ఖర్చుపెట్టారా లేక ఆ ఖర్చును నేహారెడ్డి నుంచి వసూలు చేస్తారా అన్నది ఆసక్తికరంగా మారింది.

English summary

ap high court orders greater visakhapatnam municipal corporation to collect amount for demolition of ysrcp mp vijayasai reddy's daughter neha reddy's illegal construction.