కోటిపల్లి-నరసాపురం రైల్వే లైన్ పై మరో గుడ్ న్యూస్- ఏపీ సర్కార్ కీలక ఉత్తర్వులు..!

దశాబ్దాలుగా గోదావరి జిల్లాల వాసులకు తీరని కలగా ఉన్న కోటిపల్లి-నరసాపురం రైల్వే లైన్ (Kotipalli-Narasapur Railway Line) నిర్మాణానికి ఇవాళ మరో అడుగు పడింది. ఈ రైల్వే లైన్ నిర్మాణాన్ని కేంద్ర, రాష్ట్ర ప్రభుత్వాలు ఉమ్మడిగా చేపడుతున్నాయి. ఇందులో భాగంగా రాష్ట్ర ప్రభుత్వం (AP Govt ) తరఫున చెల్లించాల్సిన అదనపు నిధుల్ని ఇవాళ విడుదల చేస్తూ ఉత్తర్వులు జారీ అయ్యాయి. ఈ మేరకు రూ.100 కోట్లు రాష్ట్ర వాటాగా రైల్వే శాఖకు చెల్లించేందుకు వీలుగా ప్రభుత్వం జీవో జారీ చేసింది.

కోటిపల్లి-నరసాపురం మధ్య కొత్త బ్రాడ్‌గేజ్ రైల్వే లైన్ కోసం కోనసీమ ప్రాంత ప్రజలు చాలా కాలంగా ఎదురు చూస్తున్నారు. 57.21 కి.మీ పొడవైన ఈ కొత్త రైల్వే లైన్ ప్రాజెక్టు 2000-01లోనే మంజూరైంది. దీని అంచనా వ్యయం ప్రస్తుతం సుమారు ₹2,120 కోట్లకు చేరింది. కోటిపల్లి నుంచి నరసాపురం వరకు ఈ రైల్వే లైన్ నిర్మిస్తారు. ఇది పూర్తయితే అమలాపురం, పేరూరు, పసర్లపూడి, జగ్గన్నపేట, రాజోలు వంటి ప్రాంతాలకు రైల్వే కనెక్టివిటీ లభించనుంది. కోటిపల్లి-అమలాపురం మధ్య 12.70 కి.మీ, అమలాపురం-చించినాడ మధ్య 33.88 కి.మీ, చించినాడ-నరసాపురం మధ్య 10 కి.మీగా ఈ రైల్వే లైన్ నిర్మిస్తున్నారు. ఈ ప్రాజెక్టులో అత్యంత కీలకమైన భాగం గోదావరికి ఉన్న మూడు ఉప నదులు గౌతమి, వైనతేయ, వశిష్ఠపై వంతెనల నిర్మాణం.

ఈ ప్రాజెక్టుకు అయ్యే ఖర్చులో రాష్ట్రం 25 శాతం, కేంద్రం 75 శాతం భరిస్తున్నాయి. ఈ ప్రాజెక్టులో తన వాటా మొత్తంలో 52.69 కోట్లు ఇప్పటికే ప్రభుత్వం చెల్లించింది. ఇవాళ మరో 100 కోట్లు చెల్లించేందుకు వీలుగా ఉత్తర్వులు జారీ చేసారు. అలాగే భూసేకరణ, సివిల్ పనుల్లో 25 శాతం వాటా ఇచ్చేందుకు సిద్దంగా ఉన్నట్లు ఉత్తర్వుల్లో తెలిపారు. ఈ రైల్వే లైన్ ప్రాజెక్టుకు మొత్తం 421.35 హెక్టార్ల భూమి అవసరం కాగా.. ఇప్పటికే 162.52 హెక్టార్లు రాష్ట్ర ప్రభుత్వం అప్పగించింది. మిగిలిన భూమిని కూడా ప్రభుత్వం అప్పగించనుంది. దీంతో ఈ ప్రాజెక్టు వేగంగా పూర్తవుతుందని భావిస్తున్నారు. కేంద్ర, రాష్ట్ర ప్రభుత్వాలు సహకరించుకుంటూ అడుగులు వేస్తే త్వరలోనే ఈ ప్రాజెక్టు పనులు పూర్తి చేసే అవకాశం ఉంది.