విభజన తప్పదు, వృథానే: కిల్లి, కిరణ్‌పై కేసు నమోదు

By Srinivas

Published: Monday, November 18, 2013, 10:17 [IST]

చిత్తూరు/హైదరాబాద్: రాష్ట్ర విభజన నిర్ణయం ఎప్పుడో జరిగిపోయిందని, ప్రత్యేక రాష్ట్ర ఏర్పాటు ఆగదని కేంద్రమంత్రి కిల్లి కృపారాణి ఆదివారం అన్నారు. చిత్తూరు జిల్లా తిరుపతిలోని రాష్ట్రీయ సంస్కృత విద్యాపీఠంలో ఆదివారం పలు ప్రారంభోత్సవాలు, చిత్తూరు, నెల్లరు జిల్లాల పరిధిలో ఇటీవల ఎన్నికైన సర్పంచులకు సత్కార సభలో ఆమె పాల్గొన్నారు. ఈ సందర్భంగా ఎంపి చింతామోహన్ సారథ్యంలో మాజీ ఎమ్మెల్యే వెంకటరమణ అధ్యక్షతన నిర్వహించిన సభలో కిల్లి ప్రసంగించారు.

తాము ఎప్పటికీ సమైక్యవాదులమే అన్నారు. అయితే ప్రత్యేక రాష్ట్ర ఏర్పాటు ప్రక్రియ ముందుకు సాగుతుంటే విభజన ఆగుతుందని తాను అనుకోవడం లేదన్నారు. మనకు రావాల్సిన హక్కులను కాపాడుకోవడం తప్ప మరో మార్గం వృథా అన్నారు. సమైక్యం కోసం పాకులాడడం కాకుండా సీమాంద్రకు రావాల్సిన హక్కులపై పోరాటం తప్ప మరేమి చేయలేమన్నారు.

రాష్ట్ర విభజనకు ప్రధాన కారణం తెలుగుదేశం పార్టీ అదినేత నారాచంద్రబాబు నాయుడు, వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డిలేనని ఆరోపించారు. విభజనకు సానుకూలంగా కేంద్రానికి సంకేతాలు ఇస్తూ లేఖలు ఇచ్చిన ఆ రెండు పార్టీలు గతాన్ని మరిచి వ్యవహారించడం విడ్డూరంగా వుందన్నారు. చంద్రబాబు, జగన్ ఇద్దరు సీమాంద్ర ప్రజలపై కపట ప్రేమ చూపిస్తున్నారన్నారు.

కిరణ్ పైన కేసు నమోదు

రంగారెడ్డి జిల్లా కోర్టు ఆదేశాల మేరకు ముఖ్యమంత్రి కిరణ్ కుమార్ రెడ్డిపై సరూర్‌నగర్ పోలీసు స్టేషన్ పోలీసులు కేసు నమోదు చేశారు. ముఖ్యమంత్రి కేంద్రానికి తప్పుడు నివేదికలు ఇస్తూ ఇరు ప్రాంతాల వారినీ రెచ్చగొడుతున్నారంటూ గతంలో న్యాయవాది జనార్దన్ రంగారెడ్డి జిల్లా కోర్టులో పిటిషన్ దాఖలు చేశారు. పిటిషన్‌ను పరిశీలించిన కోర్టు ఈమేరకు కేసు నమోదు చేయాల్సిందిగా సరూర్‌నగర్ పోలీసులను ఆదేశించింది.

Published On November 18, 2013