ఎవరి పని వాళ్లే చూస్కోవాలి: గంటాపై బాలరాజు ఆగ్రహం

విశాఖ/హైదరాబాద్: ఎవరి పని వారు చూసుకోవాలంటూ మంత్రి గంటా శ్రీనివాస రావుకు మరో మంత్రి బాలరాజు బుధవారం కౌంటర్ ఇచ్చారు. విశాఖ జిల్లాలో ముఖ్యమంత్రి కిరణ్ కుమార్ రెడ్డి రచ్చబండ కార్యక్రమం గురించి తనకు ముందస్తు సమాచారం లేదని చెప్పారు. అలాగే తనకు ఎవరితోను విభేదాలు లేవన్నారు.

తనకు రచ్చబండపై సమాచారం విషయమై గంటా మాట్లాడినట్లుగా తాను మీడియాలో చూశానని కానీ, అది ఆయన ఉద్యోగం కాదని తెలుసుకోవాలన్నారు. ఎవరి పని వారు చూసుకుంటే మంచిదన్నారు. తనంతట తానే ఈ విషయం చెబుతున్నారా లేక ముఖ్యమంత్రి చెప్పమంటే చెబుతున్నావా అని ప్రశ్నించారు.

ఇటీవల విశాఖ జిల్లాలో ముఖ్యమంత్రి రచ్చబండ కార్యక్రమం జరిగిన విషయం తెలిసిందే. ఇది రగడకు దారి తీసింది. కిరణ్ రచ్చబండ కార్యక్రమానికి తనకు ఎలాంటి సమాచారం లేదని బాలరాజు చెప్పి ఆ కార్యక్రమానికి హాజరు కాలేదు.

దీంతో గంటా శ్రీనివాస రావు మంగళవారం ఈ విషయమై మాట్లాడుతూ.. బాలరాజు తనకు సమాచారం లేదని చెప్పడం సరికాదని చెప్పారు. గంటా వ్యాఖ్యలపై బాలరాజు ఈ రోజు ఆగ్రహం వ్యక్తం చేశారు. ఎవరి పని వారు చూసుకోవాలని హితవు పలికారు.

English summary

Minister Balaraju on Wednesday fired at Ganta Srinivas Rao for his statement against him.