అందరూ నా కొడుకేమో అనుకుని ఫోన్లు, బాధ కలిగించింది: నారాయణ

ఆంధ్రప్రదేశ్ మంత్రి నారాయణ కుమారుడు నిశిత్ చిన్నవయస్సులోనే మృతి చెందడం బాధాకరమని సీపీఐ నేత నారాయణ అన్నారు. ఎంతో జీవితం అనుభవించాల్సిన యువకుడు ఆకస్మికంగా చనిపోవడం తనను కలిచివేసిందన్నారు.

Updated: Thursday, May 11, 2017, 8:13 [IST]

హైదరాబాద్: ఆంధ్రప్రదేశ్ మంత్రి నారాయణ కుమారుడు నిశిత్ చిన్నవయస్సులోనే మృతి చెందడం బాధాకరమని సీపీఐ నేత నారాయణ అన్నారు. ఎంతో జీవితం అనుభవించాల్సిన యువకుడు ఆకస్మికంగా చనిపోవడం తనను కలిచివేసిందన్నారు.

ఉదయం నుంచీ ఫోన్లూ

ఇది దురదృష్టకరమైన ఘటన అని నారాయణ అన్నారు. కాగా, ప్రమాద వార్త తెలిసిన కొందరు తన కుమారుడు చనిపోయాడనుకుని బుధవారం ఉదయం నుంచి తనకు ఫోన్ చేస్తున్నారని.. అప్పుడే తనకు మంత్రి నారాయణ కుమారుడు చనిపోయిన విషయం తెలిసిందని చెప్పారు.

ప్రాణం తీసుకురాలేం

ఈ ప్రమాదం నుంచి యువత ఎంతో నేర్చుకోవాలని, విలువైన జీవితాన్ని వృథాగా కోల్పోకూడదని నారాయణ అన్నారు. ఎంత డబ్బులున్నా పోయిన ప్రాణాలను తీసుకురాలేమన్నారు.

మంచి స్నేహితుడు

ఏపీ మంత్రి నారాయణ వ్యక్తిగతంగా మంచి స్నేహితుడని చెప్పారు. ఆయన కుటుంబంలో ఇలాంటి విషాదం చోటు చేసుకోవడం తనకు బాధ కలిగించిందని నారాయణ చెప్పారు.

తెల్లవారుజామునే..

బుధవారం తెల్లవారుజామునే జూబ్లీహిల్స్‌ రోడ్‌ నెంబర్‌ 36లో జరిగిన రోడ్డుప్రమాదంలో ఆంధ్రప్రదేశ్‌ మంత్రి నారాయణ కుమారుడు నిశిత్‌ నారాయణ(22), అతడి స్నేహితుడు రవిచంద్ర మృతి చెందారు. వీరిద్దరూ ప్రయాణిస్తున్న బెంజ్‌ కారు అదుపుతప్పి మెట్రో పిల్లర్‌ను ఢీకొనడంతో ఈ ప్రమాదం జరిగింది. గురువారం నెల్లూరులో నిశిత్ అంత్యక్రియలు జరగనున్నాయి.