TTD: తిరుమలలో భద్రతపై కీలక నిర్ణయం - ఇక నుంచి..!!

Tirumala: తిరుమలలో భక్తుల రద్దీ కొనసాగుతోంది. భక్తుల రద్దీకి అనుగుణంగా టీటీడీ కీలక నిర్ణయాలు తీసుకుంటోంది. క్యూ లైన్లలోనూ కొత్త విధానం అమల్లోకి తీసుకొస్తున్నారు. అదే విధంగా శ్రీవాణి టికెట్ల కోసం కొత్త కేంద్రాన్ని అందుబాటులోకి తెచ్చారు. ఆపరేషన్ సింధూర్ వేళ నుంచి తిరుమలలో భద్రత పైన ప్రత్యేకంగా ఫోకస్ చేసారు. డీజీపీ హరీష్ కుమార్ గుప్తా శ్రీవారిని దర్శనం చేసుకున్నారు. ఆ తరువాత తిరుమల భద్రత పైన నిర్వహించిన సమీక్షలో కీలక నిర్ణయాలు తీసుకున్నారు. కొత్త విధానాలు అమలుకు నిర్ణయించారు.

తిరుమలలో భద్రత పైన సమీక్షలో భాగంగా డీజీపీ హరీష్ కుమార్ గుప్తా కీలక సూచనలు చేసారు. దేశంలో ప్రస్తుతం నెలకొని ఉన్న పరిస్థితులను దృష్టిలో ఉంచుకొని తిరుమలలో భద్రతను ఏ విధంగా మరింత బలోపేతం చేయాలని సూచించారు. తిరుపతి ఎస్పీ మరియు టీటీడీ ఇన్ ఛార్జ్‌ సీవీఎస్వో శ్రీ హర్షవర్ధన్ రాజు భద్రతా అంశాలపై పవర్ పాయింట్ ప్రజంటేషన్ ఇచ్చారు. అంతర్జా తీయంగా తిరుమలకు ఉన్న ప్రత్యేకతను దృష్టిలో ఉంచుకొని మెరుగైన భద్రతా వ్యవస్థ ఏర్పాటు చేయడం అవసరమని డీజీపీ అభిప్రాయ పడ్డారు. ఏపీఎస్పీ, డీఏఆర్‌, ఎస్పీఎఫ్‌, హోంగార్డు, సివిల్ పోలీసు, టీటీడీ సెక్యూరిటీతో పాటు అత్యవసర పరిస్థితులను ఎదుర్కొనే డిజాస్టర్ మేనేజ్‌మెంట్ టీమ్ ఏర్పాటుపై దృష్టి పెట్టాలన్నారు.

వివిధ సెక్యూరిటీ ఏజెన్సీలకు స్థిరమైన స్టాండర్డ్ ఆపరేటింగ్ ప్రొసీజర్ రూపొందించాలని డీజీపీ సూచించారు. అలిపిరి వద్ద బహుళ స్థాయి వాహన తనిఖీ వ్యవస్థ, డిఫెన్స్ ఏజెన్సీలతో కలసి సెన్సార్ ప్లే సిస్టమ్, ఆధునిక భద్రతా పరికరాలు, సైబర్ భద్రత వ్యవస్థను బలోపేతం చేయడం వంటి అంశాలపై కూడా ఆయన చ‌ర్చించారు. ఈవో శ్యామల రావు తిరుమలలో తీసుకున్న చర్యల గురించి వివరించారు. భద్రతపై అనుబంధ ఏజెన్సీలతో ఒక సమన్వయ వ్యవస్థ అవసరమని అభిప్రాయ పడ్డారు. తిరుమలలో సైబర్ భద్రతా వ్యవస్థను మరింతగా బలోపేతం చేయాల‌ని పేర్కొన్నారు. విస్తృత స్థాయిలో తిరుమల భద్రతా సమీక్ష నిర్వహించడంపై సంతృప్తి వ్యక్తం చేశారు.

English summary

A high-level meeting on Security Audit was held at Annamaiah Bhavan in Tirumala in the presence of AP DGP and TTD officials