ఆడపిల్లలు కాదమ్మా వీళ్లు.. కొడుకులను మించిన రత్నాలు! కట్టుబాట్లను తెంచి కాటికి
కొడుకు లేడనే వెలితిని దాచి.. గుండె గూటిలో వారిని పెంచి.. ప్రాణంగా చూసుకున్న నాన్న లోకాన్ని వీడితే.. కట్టుబాట్ల గీతలను దాటారు ఆ ఇద్దురు ఆడబిడ్డలు. "నీ పాడెను మోసే భాగ్యం.. నీ చితికి తలకొరివి పెట్టే కర్తవ్యం మాదైంది.." అంటూ సాగిన అంతిమ యాత్రను చూసి ఆ ఊరి ప్రజల గుండెలు తల్లడిల్లాయి.
సమాజంలో మారుతున్న ఆలోచనలకు, ఆడపిల్లల ఆత్మస్థైర్యానికి అద్దం పడుతూ.. కన్నతండ్రి పాడెను భుజాన మోయడమే కాకుండా, శ్మశానవాటికలో తలకొరివి పెట్టి తమ పితృభక్తిని, కర్తవ్యాన్ని చాటుకున్నారు. తూర్పుగోదావరి జిల్లా రావులపాలెంలో జరిగిన ఈ ఘటన స్థానికులను తీవ్ర భావోద్వేగానికి గురిచేయడంతో పాటు ప్రతి ఒక్కరి చేత కంటతడి పెట్టించింది.
గుండెపగిలే విషాదం.. అండగా నిలిచిన ఆడబిడ్డలు!
రావులపాలెం గ్రామానికి చెందిన డొంకిన సుబ్రహ్మణ్యం (39) అనే వ్యక్తి అకస్మాత్తుగా బ్రెయిన్ స్ట్రోక్ కు గురై కన్నుమూశారు. చిన్న వయసులోనే ఇంటి యజమాని మరణించడంతో ఆయన భార్య మంగాదేవి, కుమార్తెలు కళ్యాణి, గాయత్రి తీవ్ర శోకసముద్రంలో మునిగిపోయారు. సుబ్రహ్మణ్యానికి కుమారులు లేకపోవడంతో అంతిమ సంస్కారాలు ఎవరు నిర్వహించాలనే ప్రశ్న తలెత్తిన వేళ.. ఆ ఇద్దరు కుమార్తెలు కన్నీరు తుడుచుకుని తామే ఈ బాధ్యతను స్వీకరిస్తామని ముందుకొచ్చారు.
ఊరేగింపుగా వెళ్లి.. సంప్రదాయబద్ధంగా అంత్యక్రియలు
ఆడపిల్లలు స్మశానానికి వెళ్లకూడదనే పాత చింతకాయ పద్ధతులను పక్కనబెట్టి.. తండ్రిపై ఉన్న అపారమైన అనురాగంతో శ్మశానవాటిక వరకు నడిచారు. తండ్రి పాడెను తమ భుజాలపై మోస్తూ కదిలిన ఆ దృశ్యం చూసి బంధుమిత్రులు, గ్రామస్తులు ముక్కున వేలేసుకున్నారు. అనంతరం హిందూ సంప్రదాయాల ప్రకారం అంతిమ సంస్కారాల ప్రక్రియను పూర్తి చేసి, తండ్రి చితికి తలకొరివి పెట్టారు.
"నాన్న మమ్మల్ని ప్రాణంగా చూసుకున్నారు. జీవితాంతం మాకు కొడుకు లేడనే బాధ తెలియకుండా పెంచారు. అలాంటి నాన్నకు ఆఖరి వీడ్కోలు పలికే అదృష్టం, బాధ్యత మాకే దక్కాలని భావించాం" అంటూ ఆ కుమార్తెలు కన్నీటిపర్యంతమయ్యారు. సమాజంలో కొడుకులే అంత్యక్రియలు చేయాలనే మూఢనమ్మకాలను బద్దలు కొడుతూ.. కన్నతండ్రిపై తమకున్న ప్రేమే శ్రేష్ఠమైనదని నిరూపించిన ఈ ఇద్దరు ఆడబిడ్డల ధైర్యాన్ని, సంస్కారాన్ని రావులపాలెం ప్రజలు చేతులెత్తి మొక్కుతూ ప్రశంసించారు.
Click it and Unblock the Notifications
Sign in with Google