సుద్దాల అశోక్ తేజకు కొమరం భీం నేషనల్ అవార్డు

హైదరాబాద్: కొమరం భీమ్ స్మారక ఉత్సవ పరిషత్, ఆదివాసి సంస్కృతి పరిరక్షణ సమితి, భారత కల్చరల్ అకాడమి, ఓం సాయితేజా ఆర్ట్స్ సంయుక్తంగా గత నాలుగు సంవత్సరాలుగా ప్రదానం చేస్తున్న కొమరం భీం జాతీయ పురస్కారం - 2014వ సంవత్సరానికిగాను ప్రముఖ రచయిత డాక్టర్ సుద్దాల అశోక్ తేజను ఎంపిక చేశారు.

గత సంవత్సరం ఈ అవార్డును సినీ దర్శకుడు అల్లాణి శ్రీధర్‌కు ఇచ్చారు. గత నాలుగు సంవత్సరాలుగా ఈ అవార్డు ఉత్సవాన్ని క్రమం తప్పకుండా ఈ సంస్థ ఘనంగా నిర్వహిస్తోంది. గిరిజన హక్కుల కోసం, జల్-జంగల్-జమీన్ కోసం అనుక్షణం పోరాడి నిజాం సైనికుల కాల్పుల్లో అసువులు బాసిన గొప్ప పోరాట యోధుడు కొమరం భీం.

అతని స్మారకంగా నాటికలు, సీరియళ్లు, లఘు చిత్రాలను ఈ సంస్థ నిర్మిస్తూ కొమరం భీం ఆశయాలను పలు విధాలుగా ప్రచారం చేస్తోంది.

పలు అభ్యుదయ గేయాల ద్వారా, సామాజిక రచనల ద్వారా డాక్టర్ సుద్దాల అశోక్ తేజ కొమరం భీం ఆశయ సాధనలో కృషి చేస్తున్నందు వల్ల ఈ పురస్కారానికి ఎంపిక చేసినట్లు తెలిపారు. అక్టోబర్ 3వ వారంలో రవీంద్ర భారతిలో ఈ అవార్డు ప్రదానం జరుగుతుంది. ఈ అవార్డు కింద రూ.50,116 నగదు, జ్ఞాపిక, శాలువా, సన్మానపత్రంను సుద్దాల అశోక్ తేజకు అందిస్తారు.

English summary

Komaram Bheem National Award to writer Suddala Ashok Teja.