ఒత్తిడితోనే: కెవిపి రాజీనామా తిరస్కరణ, టిడిపి దూరం?

న్యూఢిల్లీ: కాంగ్రెసు పార్టీ సీనియర్ నేత, రాజ్యసభ సభ్యుడు కెవిపి రామచంద్ర రావు రాజీనామాను చైర్మన్ హమీద్ అన్సారీ తిరస్కరించినట్లుగా తెలుస్తోంది. కెవిపిని ఇటీవల అన్సారీ తన ఛాంబర్‌కు పిలిపించుకొని రాజీనామా గురించి వాకబు చేశారట. సీమాంధ్ర ఉద్యమ ఒత్తిడి కారణంగానే రాజీనామా చేశారని భావించిన అన్సారీ దానిని తిరస్కరించినట్లుగా చెబుతున్నారు.

మరోవైపు తెలుగుదేశం పార్టీకి చెందిన ఇద్దరు రాజ్యసభ సభ్యులు సిఎం రమేష్, సుజనా చౌదరి తమ రాజ్యసభ సభ్యత్వాలకు రాజీనామా చేయలేదని వార్తలు వచ్చిన విషయం తెలిసిందే. ప్రత్యేక తెలంగాణ రాష్ట్రాన్ని ఏర్పాటు నిర్ణయానికి నిరసనగా రాజ్యసభ సభ్యత్వాలకు రాజీనామా చేస్తున్నట్టు రమేష్, సృజనా చౌదరి ప్రకటించారు.

తెలుగుదేశం పార్టీకి చెందిన లోక్‌సభ సభ్యులు శివప్రసాద్, నిమ్మల కిష్టప్ప, వేణుగోపాల్ రెడ్డి మాదిరిగానే రమేష్, సుజనా చౌదరి కూడా రాజీనామాలు చేస్తున్నట్లు ప్రకటించారే తప్ప తమ రాజీనామా లేఖలను రాజ్యసభ చైర్మన్ హమీద్ అన్సారీకి అందజేయలేదట.

రాష్ట్ర విభజనకు నిరసనగా రాజ్యసభ సభ్యత్వానికి తెలుగుదేశం సభ్యుడు హరికృష్ణ చేసిన రాజీనామాను వెంటనే ఆమోదించిన విషయం తెలిసిందే. తాము కూడా తమ సభ్యత్వాలకు రాజీనామా చేస్తున్నట్టు సీమాంధ్రకు చెందిన సిఎం రమేష్, సుజనా చౌదరిలు ప్రకటించారు. అయితే వారి రాజీనామాలకు సంబంధించిన వివరాలు తమ రికార్డుల్లో లేవని, ఫార్మాట్లో ఇచ్చినా, ఇవ్వకపోయినా ఆ వివరాలు పొందుపరుస్తామని రాజ్యసభ కార్యాలయం చెబుతోందట.

English summary

It is said that Rajya Sabha chariman rejected KVP Ramachandra Rao's resignation.