రాప్తాడు బాలిక కోసం బెంగళూరుకు మంత్రి లోకేష్ -తాజా హెల్త్ అప్డేట్ ఇదే..!!
అనంతపురం జిల్లా రాప్తాడు మండలంలో ఒక ఉన్మాది జరిపిన కిరాతక దాడిలో తీవ్రంగా గాయపడిన పదో తరగతి విద్యార్థిని ప్రస్తుతం బెంగళూరులోని మణిపాల్ ఆసుపత్రిలో చికిత్స పొందుతోంది. ప్రాణాపాయ స్థితిలో ఆసుపత్రికి వచ్చిన బాలికకు నిపుణులైన వైద్య బృందం అత్యవసర సేవలు అందించడంతో ప్రస్తుతం ఆమె ఆరోగ్య పరిస్థితి నిలకడగా ఉందని వైద్యులు తెలిపారు. ఈ ఘోర ఘటనపై ఆంధ్రప్రదేశ్ ప్రభుత్వం తక్షణమే స్పందించి బాలిక ప్రాణాలు కాపాడేందుకు అన్ని చర్యలు చేపట్టింది.
మణిపాల్ ఆసుపత్రి వైద్యులు బాలికకు ఆర్థోపెడిక్, ప్లాస్టిక్ శస్త్రచికిత్సలను అత్యంత శ్రద్ధతో విజయవంతంగా పూర్తి చేశారు. శస్త్రచికిత్సల ప్రక్రియ పూర్తయిన తర్వాత తగిన నిరంతర పరిశీలన కోసం ఆమెను పీడియాట్రిక్ ఇంటెన్సివ్ కేర్‌ యూనిట్‌ (PICU)కు తరలించారు. అత్యవసరమైన శస్త్రచికిత్సల దశ సఫలం కావడంతో విద్యార్థిని క్రమంగా కోలుకుంటుందని ఆసుపత్రి వైద్య బృందం ఆశాభావం వ్యక్తం చేసింది.
గ్రీన్ ఛానల్ ద్వారా బెంగళూరుకు తరలింపు
ఈ ఘటన జరిగిన వెంటనే రాష్ట్ర విద్యుత్, విద్యాశాఖ మంత్రి నారా లోకేశ్ వేగంగా స్పందించారు. బాధిత బాలికకు అత్యుత్తమ వైద్య సేవలు అందించాలనే లక్ష్యంతో కర్ణాటక ప్రభుత్వ అధికారులతో స్వయంగా మాట్లాడి ప్రత్యేక గ్రీన్ ఛానల్ మార్గాన్ని ఏర్పాటు చేయించారు. అత్యధునిక లైఫ్‌ సపోర్ట్ అంబులెన్సు ద్వారా విద్యార్థినిని అనంతపురం నుంచి బెంగళూరులోని మణిపాల్ సూపర్‌ స్పెషాలిటీ ఆసుపత్రికి ఎలాంటి అడ్డంకులు లేకుండా వేగంగా తరలించారు.
నేరుగా బెంగళూరు వెళ్లి పరామర్శించిన మంత్రి లోకేశ్
అధికారులకు ఆదేశాలు ఇవ్వడమే కాకుండా, మంత్రి నారా లోకేశ్ ఆదివారం మధ్యాహ్నం స్వయంగా బెంగళూరులోని మణిపాల్ ఆసుపత్రికి వెళ్లారు. అక్కడ చికిత్స పొందుతున్న విద్యార్థినిని పరామర్శించి, ఆమెకు అందిస్తున్న వైద్య సేవల వివరాలను వైద్యులతో సుదీర్ఘంగా చర్చించారు. బాలిక సంపూర్ణ ఆరోగ్యంతో బయటపడే వరకు అత్యుత్తమ వైద్యం అందించాలని ఆసుపత్రి వర్గాలకు లోకేశ్ విజ్ఞప్తి చేశారు.
తీవ్ర విషాదంలో ఉన్న బాధిత కుటుంబ సభ్యులను మంత్రి లోకేశ్ పరామర్శించి వారికి కొండంత ధైర్యాన్ని అందించారు. తమ సొంత కుటుంబ సభ్యురాలికి ఆపద వచ్చినట్లుగా భావించి, వైద్యానికి అయ్యే పూర్తి ఖర్చులను ప్రభుత్వమే భరిస్తుందని స్పష్టం చేశారు. వైద్యుల నిరంతర శ్రమ, ప్రజల ప్రార్థనల వల్ల చికిత్సలో కీలక దశ పూర్తయిందని, బాలిక త్వరలోనే పూర్తి ఆరోగ్యంతో మళ్లీ నవ్వుతూ బడికి వెళ్లాలని ఆకాంక్షించారు.
Click it and Unblock the Notifications
Sign in with Google
