మరో ప్లాన్: ఈ-ఆఫీస్, బాబు తొలి డిజిటల్ సంతకం (పిక్చర్స్)

By Srinivas

Published: Sunday, December 21, 2014, 13:23 [IST]

హైదరాబాద్: సచివాలయాన్ని వచ్చే ఏడాది మార్చి 31 నాటికి ఈ-సచివాలయంగా మార్పు చేసేందుకు చర్యలు తీసుకుంటున్నట్లు ఆంధ్రప్రదేశ్ ముఖ్యమంత్రి నారా చంద్రబాబు నాయుడు శనివారం చెప్పారు.

ఈ-ఆఫీసుపై సమీక్షించారు. ఈ సందర్భంగా ఒక ఫైలుపై తొలి డిజిటల్ సంతకాన్ని చంద్రబాబు చేయడం ద్వారా ఈ ప్రక్రియను ప్రారంభించారు.

సచివాలయం నుంచి గ్రామ స్థాయి వరకు ఈ-ఫైల్ సిస్టమ్‌ను ఏర్పాటుచేయడం వల్ల పాలనలో వేగం తీసుకురావచ్చునని చెప్పారు. అలాగే పారదర్శకత కూడా పెంపొందించేందుకు ఆస్కారం ఉంటుందన్నారు.

ఈ-ఆఫీస్

ఫైళ్లు నిర్వహణ, ఫైళ్లు ఎక్కడ ఉన్నాయి, ఏ స్థాయిలో ఉన్నాయన్నది కూడా గుర్తించేందుకు ఈ-ఆఫీస్‌లో అవకాశాలు పెరుగుతాయన్నారు. దీనివల్ల అధికారులు, ఉద్యోగులకు పనిభారం కూడా తగ్గుతుందన్నారు. విలువైన సమయం కూడా ఆదా అవుతుందని చంద్రబాబు చెప్పారు.

ఈ-ఆఫీస్

అధికారి ఎక్కడ ఉన్నా ఫైళ్లను అక్కడి నుంచే పరిష్కరించేందుకు ఆస్కారం ఉంటుందన్నారు. ఫైళ్లను దాచి ఉంచాల్సిన స్థలం సమస్య, పాత ఫైళ్లను బూజు దులిపే సమయంలో వచ్చే అలర్జీ కూడా తగ్గుతుందన్నారు.

ఈ-ఆఫీస్

సాంకేతికతను అందిపుచ్చుకోలేకపోవడం వల్ల కాలంతో పరుగులు తీయలేకపోతున్నామని, ఉద్యోగులు సహకరించి కొత్త విధానానికి శ్రీకారం చుట్టాలని పిలుపునిచ్చారు. దీనిపై ప్రభుత్వం నుంచి వత్తిళ్లు ఉండబోవని, అయితే సాంకేతిక దిశగా అభివృద్ధి చెందాల్సిన అవసరాన్ని మరచిపోరాదన్నారు.

ఈ-ఆఫీస్

ఈ-ఫైళ్ల నిర్వహణపై ఉద్యోగులకు, నిపుణులతో శిక్షణ ఇప్పించనున్నట్లు ముఖ్యమంత్రి వెల్లడించారు. ఈ విధానానికి అంతా సహకరించి ఆదర్శవంతమైన సచివాలయ వ్యవస్థను రూపొందించేందుకు చర్యలు తీసుకోవాలని పిలుపునిచ్చారు.