టూరిస్ట్స్, ప్రేమజంటలు టార్గెట్: దోపిడీ, అఘాయిత్యం

ప్రకాశం: బీచ్‌కు వచ్చిన ప్రేమజంటలను, ఇతరులను టార్గెట్ చేసుకొని వారి వద్ద నుండి నగదు, నగలు దోపిడీ చేసి, ఆ తర్వాత అమ్మాయిపై అత్యాచారం జరిపే రెండు ముఠాలను ప్రకాశం జిల్లా పోలీసులు పట్టుకున్నారు. ప్రకాశం జిల్లాలోని వేటపాలెం, చీరాల మండలాల్లో పలు ప్రాంతాల్లో సముద్ర తీర ప్రాంతాల్లో పర్యాటకులపై దాడి చేసి అఘాయిత్యాలకు పాల్పడుతున్న రెండు ముఠాల్లోని పదిమందిని అరెస్టు చేశారు.

సోమవారం చీరాల వన్‌టౌన్ పోలీస్‌స్టేషన్‌లో డిఎస్పీ నరహర వివరాలను వెల్లడించారు. నిందితుల నుంచి రూ.3.50లక్షల విలువైన బంగారం, ఎనిమిది సెల్‌ఫోన్లను స్వాధీనం చేసుకున్నారు. రెండు ముఠాల్లో కలిపి పదిమంది ఉన్నారు. వీరంతా రామాపురం, వాడరేవు తదితర ప్రాంతాల్లో ఒంటరిగా ఉండే పర్యాటకులు, ఏకాంతంగా ఉండే జంటలపై ప్రత్యేకంగా దృష్టి సారించి అరాచకాలకు పాల్పడేవారు.

ప్రధానంగా నగలు, డబ్బు, సెల్‌ఫోన్లను అపహరించేవారు. కొన్ని సందర్భాల్లో జంటలలోని మహిళలపై అఘాయిత్యాలకు పాల్పడేవారు. కొందరు బాధితులు పోలీసుల వరకూ వెళ్తే పరువుపోతుందని వెనుకంజ వేయడంతో వారి ఆగడాల శృతిమించాయి. ఈ రెండు ముఠాలకు సంబంధించి ఇటీవల నమోదైన కేసుల ఆధారంగా నిందితులను అదుపులోకి తీసుకున్నారు.

20 పైగా నేరాలు చేసినట్లు పోలీసుల విచారణలో తేలింది. పోలీసులకు అందిన రిపోర్టుల్లో బంగారు ఆభరణాలు అపహరించినట్లు మాత్రమే ఉంది. తీగలాగితే డొంక కదిలినట్లు వీరి అరా చకాలు వెలుగు చూశాయి. నిందితులను కోర్టుకు హాజరుపరచనున్నట్లు డిఎస్పీ తెలిపారు.

English summary

Police on Monday arrested ten members of two robbers' gangs, who looted people in Prakasam district.