TTD: తిరుమల భక్తులకు అలర్ట్, ముచ్చటగా మూడు కిలోమీటర్లు క్యూ, కొండ మీద వద్దంటే వాన

కలియుగదైవం శ్రీవెంకటేశ్వరస్వామి కొలువుతీరిన తిరుమలలో భక్తుల రద్దీ విపరీతంగా ఉంది. వేసవి సెలవులు కావడం, వీకెండ్ దెబ్బతో తిరుమలకు భక్తులు పోటెత్తారు. ఇటీవలే ఆంధ్రప్రదేశ్ లో అసెంబ్లీ ఎన్నికలు కూడా పూర్తి కావడంతో పలు జిల్లాల్లోని అన్ని పార్టీల నాయకులు వీలు చూసుకుని ఏడుకొండలస్వామిని దర్శించుకోవడానికి తిరుమలకు చేరుకున్నారు.

వేసవి సెలవులు కావడంతో తిరుమలలో ఎటు చూసినా భక్తులు దర్శనం ఇస్తున్నారు. అనూహ్యంగా తిరుమల కొండ మీద భక్తులు పెరిగిపోవడంతో టీటీడీ అధికారులు, సిబ్బంది అలర్ట్ అయ్యారు. తిరుమలలో సామాన్య భక్తులు క్యూ కాంప్లెక్స్ ల ద్వారా వెళ్లి శ్రీవారిని దర్శించుకోవడానికి 24 గంటల సమయం పడుతోంది. శుక్రవారం తిరుమలలో ఇంకా రద్దీ ఎక్కువగా పెరిగిపోవడంతో సామాన్య భక్తులు శ్రీవారిని దర్శించుకునే సమయంలో ఇంకా ఎక్కువ గంటలు పట్టే అవకాశం ఉందని తెలిసింది

తిరుమలలో వైకుంఠం క్యూకాంప్లెక్స్ లు నిండిపోయి క్యూ బయటకు వచ్చింది. క్యూకాంప్లెక్స్ లు నిండిపోవడంతో నారాయణగిరి ఉద్యానవనంలోని షెడ్లు కూడా నిండిపోయి క్యూ మూడు కిలోమీటర్ల పొడవు వచ్చింది. టోకన్లు లేకుండా సర్వదర్శనం చేసుకోవడానికి వచ్చిన భక్తులకు ఎప్పుడు దర్శనం అవుతుందో తెలీయడం లేదు. ఎన్ని గంటలు అయినా పర్వాలేదని, స్వామివారిని దర్శించుకుంటే చాలు అని భక్తులు అంటున్నారు.

క్యూకాంప్లెక్స్ లు నిండిపోయి క్యూలైన్లు బయటకు రావడంతో భక్తులు నానా ఇబ్బందిపడ్డారు శుక్రవారం తిరుమలలో భారీ వర్షం పడటంతో ఏడుకొండలు తడిచి ముద్ద అయ్యాయి. శుక్రవారం మద్యాహ్నం తిరుమలలో భారీ వర్షం పడటంతో శ్రీవారి ఆలయం పరిసర ప్రాంతాలు తడిచిపోయాయి. శ్రీవారిని దర్శించుకుని బయటకు వచ్చిన భక్తులు లడ్డూలు తీసుకోవడానికి వెలుతున్న సమయంలో భారీ వర్షం పడటంతో భక్తులు తడిచి ముద్ద అయ్యారు.

దాదాపు రెండు గంటల పాటు తిరుమలలో గ్యాప్ లేకుండా వర్షం పడటంతో భక్తులు ఇబ్బందులు పడ్డారు. అయితే భారీ వర్షం పడటంతో తిరుమలలో వాతావరణంలో మార్పులు వచ్చి చల్లగా ఉండటంతో భక్తులు హాయిగా తిరుమలలో తిరుగుతున్నారు. వీకెండ్ సందర్బంగా శనివారం, ఆదివారం తిరుమలలో భక్తుల రద్దీ ఇంకా ఎక్కువ అయ్యే అవకాశం ఉండటంతో అందుకు తగ్గట్లు అధికారులు అన్ని ఏర్పాట్లు చేసుకుంటున్నారు.

English summary

Vaikuntham queue complex in Tirumala is full and devotees are standing for three kilometers outside