జైలు నుంచి విడుదలైనట్లుంది: టి బిల్లుపై బలరాం

Published: Friday, December 6, 2013, 17:40 [IST]

హైదరాబాద్: తెలంగాణ బిల్లుకు కేంద్ర కేబినెల్ ఆమోద ముద్ర వేయడంతో... తమకు జైలు నుంచి విడుదలైనట్లు ఉందని కేంద్ర మంత్రి బలరాం నాయక్ అన్నారు. ఆయన శుక్రవారం మీడియతో మాట్లాడుతూ.. ఇంకెంత కాలం ఉందని, కాంగ్రెస్ సీమాంధ్ర పార్లమెంటు సభ్యుడు లగడపాటి రాజగోపాల్ ప్రభుత్వాన్ని పడగొడతామంటున్నారని ప్రశ్నించారు. రాష్ట్రం విడిపోయి రెండు రాష్ట్రాలకు ఇద్దరు ముఖ్యమంత్రులు వచ్చినా సీమాంధ్ర నేతలు సమైక్యమే అంటారని చెప్పారు.

తెలంగాణ రాష్ట్రం ఇచ్చినందుకు కాంగ్రెస్ పార్టీ అధ్యక్షురాలు సోనియా గాంధీకి జీవితాంతం రుణపడి ఉంటామని ఈ సందర్భంగా బలరాం నాయక్ తెలిపారు. హైదరాబాద్‌లో సోనియా గాంధీ విగ్రహం ఏర్పాటు చేస్తామని ఆయన చెప్పారు. జిల్లాను యూనిట్‌గా తీసుకుని అసెంబ్లీ స్థానాలు పెంచాలని ఆయన కోరారు. తెలంగాణ ఇప్పుడు రాకుంటే ఎప్పుడూ వచ్చేది కాదని బలరాం నాయక్ అన్నారు.

బిల్లు ఆమోదం పొందేవరకూ పోరాటం: కోదండరాం

అమరుల త్యాగం ఫలితంగానే తెలంగాణ బిల్లు తెచ్చుకోగలిగామని తెలంగాణ జెఏసి ఛైర్మన్ కోదండరాం అన్నారు. శుక్రవారం ఢిల్లీ నుంచి హైదరాబాద్ చేరుకున్న కోదండరాం విమానాశ్రయంలో మీడియాతో మాట్లాడుతూ.. పార్లమెంటులో తెలంగాణ బిల్లుకు ఆమోదం లభించే వరకు తమ పోరాటం ఆగదని అన్నారు.

తెలంగాణ ప్రజల ఆకాంక్షను గుర్తించిన యూపిఏ ప్రభుత్వానికి ఈ సందర్భంగా అభినందనలు తెలిపారు. సీమాంధ్ర ప్రజలు శాంతియుతంగా ఉండి రాష్ట్ర విభజనకు సహకరించాలని ఆయన అన్నారు. రెండు మూడు రోజుల్లో చర్చలు జరిపి భవిష్యత్ కార్యాచరణ ప్రకటిస్తామని చెప్పారు.

Published On December 6, 2013