IT Returns: రిఫండ్‌ ఇంకా రాలేదా? సింపుల్ టిప్ తో వెంటనే క్రెడిట్

గత ఆర్థిక సంవత్సరం 2024–25 కోసం దాఖలైన ఆదాయపు పన్ను రిటర్న్‌లు (ITR) ఇప్పటికీ రీఫండ్ కోసం వేచి ఉన్నాయి. సాధారణంగా డిసెంబర్ నాటికే రీఫండ్ ప్రక్రియ పూర్తవుతుందని భావిస్తే, ఈసారి సాంకేతిక సమస్యలకు తోడు ఐటీ రిటర్నులు దాఖలు చేసిన పన్నుదారుల నుంచి మరింత వివరాలు కోరడం వల్ల కొన్ని రీఫండ్లు ఆలస్యం అవుతున్నాయి.

రీఫండ్ ఆలస్యానికి ప్రధాన కారణం, ఆదాయపు పన్ను శాఖ ITRలను వార్షిక సమాచార నివేదికకు తోడు ఇతర ఆర్థిక డేటాతో క్రాస్-చెక్ చేస్తుంది. ఏదైనా వ్యత్యాసం కనిపిస్తే, పన్నుదారులకు నోటీసులు పంపి వివరణ అడుగుతుంది. సమస్య పరిష్కారం అయిన తర్వాత మాత్రమే రీఫండ్ అవుతుంది.

కొన్ని సందర్భాల్లో, ITRలోని వివరాలు 26AS/AIS తో సరిపోకపోవడం, బ్యాంక్ ఖాతా వివరాలు తప్పుగా ఇవ్వడం లేదా ధృవీకరణ చేయకపోవడం, అధిక విలువల లావాదేవీలను రిటర్న్‌లో నమోదు చేయకపోవడం, అనర్హమైన మినహాయింపులను క్లెయిమ్ చేయడం వంటి కారణాల వల్ల రీఫండ్ ఆలస్యం అవుతుంది. ITR ఫైల్ చేసిన తర్వాత ఈ-వెరిఫికేషన్ చేయకపోవడం కూడా రీఫండ్ రాకడానికి ప్రధాన కారణాలలో ఒకటి.

వీటికి తోడుగా, 2025లో ITR దాఖలుకు గడువు పొడిగించడంతో రిటర్న్‌ల సంఖ్య రికార్డు స్థాయికి చేరింది. సెంట్రలైజ్డ్ ప్రాసెసింగ్ సెంటర్ (CPC) ఈ భారీ డేటాను సరిచూసి ప్రాసెస్ చేయడానికి సమయం పడుతుంది. అందుకే కొన్ని రీఫండ్లు తక్షణమే జమ కావడం లేదు.

రీఫండ్ స్టేటస్ ను పన్నుదారులు.. ఆదాయపు పన్ను పోర్టల్ లేదా NSDL వెబ్‌సైట్ ద్వారా ఎప్పుడైనా తనిఖీ చేసుకోవచ్చు. అలాగే, రీఫండ్ ఆలస్యమైతే CPC లేదా SBI ద్వారా సంప్రదించడం సులభంగా జరుగుతుంది. అవసరమైతే పోర్టల్‌లో 'Grievance’ ఫీచర్ ద్వారా ఫిర్యాదు కూడా చేయవచ్చు.

అందువల్ల, పన్నుదారులు ఏదైనా నోటీసులు పొందకపోతే, తక్షణమే ఏమీ చేయాల్సిన అవసరం లేదు. ఆర్ధిక డేటా ధృవీకరణ, ఇంటర్నల్ చెక్ పూర్తయిన తర్వాత, రీఫండ్ తక్షణమే బ్యాంక్ ఖాతాలో జమ అవుతుంది.

ముగింపుగా, ITR రీఫండ్ అనేది మీరు వాస్తవంగా చెల్లించాల్సిన పన్ను కంటే ఎక్కువగా చెల్లించిన మొత్తాన్ని తిరిగి అందించడం. పన్నుదారులు తమ వివరాలను సరిపోల్చుకోవడం, బ్యాంక్ ఖాతాలను ధృవీకరించడం మరియు అవసరమైతే Updated Return సమర్పించడం ద్వారా రీఫండ్ సులభంగా పొందవచ్చు

ఐటీఆర్ రీఫండ్ స్టేటస్ చెక్ చేసుకోండి

ముందుగా ఈ-ఫైలింగ్ వెబ్‌సైట్‌ను https://www.incometax.gov.in/iec/foportal/ ను ఓపెన్ చేయండి. : 'లాగిన్’ బటన్‌పై క్లిక్ చేసి, మీ పాన్ వివరాలను, పాస్‌వర్డ్‌ను నమోదు చేయండి. లాగిన్ అయిన తర్వాత, మీరు హోమ్ పేజీకి చేరుకుంటారు. హోమ్ పేజీలోని టాస్క్‌బార్‌పై, 'ఈ-ఫైల్’ --> 'ఆదాయపు పన్ను రిటర్న్‌లు’ --> 'దాఖలు చేసిన రిటర్న్‌లను చూడండి’ అనే ఆప్షన్‌పై క్లిక్ చేయండి. మీరు దాఖలు చేసిన ఆదాయపు పన్ను రిటర్న్‌ల పూర్తి టైమ్‌లైన్ అసెస్‌మెంట్ సంవత్సరం వారీగా ప్రదర్శించబడుతుంది. అక్కడ మీ నిర్దిష్ట అసెస్‌మెంట్ సంవత్సరానికి సంబంధించిన రీఫండ్ స్థితిని చూడవచ్చు.

NSDLలో ఐటీఆర్ రీఫండ్ స్టేటస్ చెక్ చేసుకోండి:

https://tin.tin.nsdl.com/oltas/refund-status-pan.html వెబ్‌సైట్‌ను ఓపెన్ చేయండి. మీ పాన్ మరియు అసెస్‌మెంట్ సంవత్సరాన్ని నమోదు చేసి, 'ప్రొసీడ్’పై క్లిక్ చేయండి. అనంతరం మీ రీఫండ్ స్టేటస్ వచ్చేస్తుంది

మీ రీఫండ్ ఆలస్యమైతే ఎవరిని సంప్రదించాలి?

మీ ఐటీఆర్ రీఫండ్ దాఖలు చేసిన తేదీ నుండి ఎక్కువ కాలం ఆలస్యమైతే, మీరు సెంట్రలైజ్డ్ ప్రాసెసింగ్ సెంటర్ (CPC)ని సంప్రదించవచ్చు. దీని కోసం, దేశంలోనే అతిపెద్ద ప్రభుత్వ రంగ బ్యాంక్ అయిన స్టేట్ బ్యాంక్ ఆఫ్ ఇండియా అధికారిక రీఫండ్ బ్యాంకర్‌గా వ్యవహరిస్తోంది.

English summary

The article explains the factors behind delays in income tax refunds in India, including AIS data cross checks, the NUDGE campaign for accurate reporting, and CPC processing bottlenecks. It covers how to verify refund status on the tax portal or NSDL, and outlines options for grievances and contact details for assistance.