పాపం రూపాయి.. ఆసియాలోనే వరస్ట్ కరెన్సీగా?

Updated: Tuesday, May 26, 2026, 9:48 [IST]

అంతర్జాతీయ మార్కెట్లో నెలకొన్న మిశ్రమ సంకేతాలు, మధ్యప్రాచ్యంలో ముదురుతున్న ఉద్రిక్తతల మధ్య భారతీయ రూపాయి మూడు రోజుల వరుస లాభాలకు బ్రేక్ పడింది. మంగళవారం (మే 26) ట్రేడింగ్ సెషన్‌లో డాలర్‌తో పోలిస్తే రూపాయి విలువ 16 పైసలు క్షీణించి 95.39 వద్ద ప్రారంభమైంది. మునుపటి సెషన్‌లో ఇది 95.23 వద్ద ముగిసింది. నెలాఖరున నిధుల ప్రవాహాల ఒత్తిడితో పాటు, ఇరాన్ సెంటిమెంట్‌ను దెబ్బతీస్తూ అమెరికా జరిపిన తాజా దాడులు రూపాయి పతనానికి ప్రధాన కారణాలుగా నిలిచాయి.

గాల్లో దీపంగా ఇరాన్ శాంతి ఒప్పందం..

గత మూడు నెలలుగా సాగుతున్న ఇరాన్ యుద్ధానికి తెరదించుతూ, ప్రపంచ వాణిజ్యానికి అత్యంత కీలకమైన 'స్ట్రెయిట్ ఆఫ్ హార్ముజ్' జలసంధిని తిరిగి తెరిచేందుకు ఒక ఒప్పందం కుదురుతుందన్న ఆశాభావం ఇన్వెస్టర్లలో వ్యక్తమైంది. దీనివల్ల డాలర్ కూడా కొంత నష్టాల్లోనే సాగింది. అయితే, ఇంతలోనే ఇరాన్ లక్ష్యాలపై అమెరికా మళ్లీ నూతన దాడులకు తెగబడటంతో మార్కెట్ సెంటిమెంట్ ఒక్కసారిగా తలకిందులైంది. శాంతి ఒప్పందంపై ఆశలు అడుగంటడంతో ముడిచమురు ధరల భయాలు మళ్లీ తెరపైకి వచ్చాయి.

Indian Rupee Falls 16 Paise To 95 39 Against US Dollar As Middle East Geopolitical Tensions Escalate Rapidly

రంగంలోకి ఆర్బీఐ.. 'రక్షక' హస్తం!

రూపాయి విలువ మరింత పాతాళానికి పడిపోకుండా నిరోధించడానికి భారత రిజర్వ్ బ్యాంక్ (RBI) రంగంలోకి దిగింది. ఆర్బీఐ మార్కెట్లో చురుగ్గా జోక్యం చేసుకుని, భారీగా డాలర్లను విక్రయించడం ద్వారా రూపాయిపై ఉన్న ఊహాజనిత ఒత్తిడిని గణనీయంగా తగ్గించగలిగింది. దేశీయ ఈక్విటీ మార్కెట్లలో మెరుగుపడుతున్న రిస్క్ అపిటైట్ (పెట్టుబడుల ఉత్సాహం) కూడా రూపాయికి కొంత అండగా నిలిచింది. లేదంటే రూపాయి మరింత క్షీణించి ఉండేదని ఆర్థిక విశ్లేషణ సంస్థ 'ఫిన్‌రెక్స్' పేర్కొంది.

రెండేళ్లలో 15% క్షీణత:

గత రెండేళ్ల కాలంలో భారత రూపాయి విలువ ఏకంగా 15% మేర పడిపోయింది. చైనీస్ యువాన్ బలోపేతం కావడం, అంతర్జాతీయ మార్కెట్లో డాలర్ సూచీ 114 స్థాయి నుండి 99 స్థాయికి పడిపోయినప్పటికీ, ఆసియాలోనే అత్యంత పేలవమైన ప్రదర్శన కనబరిచిన కరెన్సీలలో రూపాయి ఒకటిగా మిగిలింది.

కరెంట్ అకౌంట్ లోటు (CAD) సెగ!

రానున్న రోజుల్లోనూ రూపాయిపై ఒత్తిడి ఇలాగే కొనసాగే అవకాశం ఉందని ఫిన్‌రెక్స్ విశ్లేషకులు అంచనా వేస్తున్నారు. దేశంలో పెరుగుతున్న దిగుమతులు, అంతర్జాతీయంగా అధిక ముడి చమురు ధరలు, మరియు ఆర్బీఐ యొక్క షార్ట్ డాలర్ పొజిషన్ల కారణంగా ప్రస్తుత ఆర్థిక సంవత్సరంలో కరెంట్ అకౌంట్ లోటు (CAD) మరింత పెరుగుతుందనే భావన మార్కెట్లో బలంగా ఉంది.

ఈ నేపథ్యంలో స్వల్పకాలిక వ్యూహంగా.. ఎగుమతిదారులు డాలర్ విలువ పెరిగిన ప్రతిసారీ తమ రాబడిని హెడ్జ్ (రక్షించుకోవడానికి) చేసుకోవడానికి డాలర్లను విక్రయిస్తున్నారు. మరోవైపు, దిగుమతిదారులు రాబోయే ఒకటి రెండు నెలల చెల్లింపుల కోసం డాలర్ విలువ పడిపోయినప్పుడు కొనుగోలు చేయడానికి ఆసక్తి చూపిస్తున్నారు.

Recommended For You