బంగారం ధరలు మీ ఊహకు కూడా అందవు ..!

ప్రపంచ ఆర్థిక మార్కెట్‌లో పెట్టుబడిదారులకు నిజంగా పండగ లాంటి వార్త ఇది! బ్యాంక్ ఆఫ్ అమెరికా విడుదల చేసిన నూతన అంచనాలు బంగారం , వెండిధరల భవిష్యత్తుపై భారీ ఆశలు రేపుతున్నాయి. ఈ లోహాల పెరుగుదలకు అడ్డుకట్ట వేయడం అసాధ్యమనే సంకేతాలను ఇస్తూ, 2026 నాటికి ధరలు ఊహించని మైలురాళ్లను చేరుకోనున్నాయని బ్యాంక్ స్పష్టం చేసింది.

బంగారానికి స్వర్ణ యుగం: రూ. 1.56 లక్షల మార్కు వైపు..
బంగారం ధరలపై అత్యంత భారీ అంచనాలను విడుదల చేసిన మొదటి ప్రధాన బ్యాంకుగా బ్యాంక్ ఆఫ్ అమెరికా నిలిచింది. వారి లెక్కల ప్రకారం, 2026 నాటికి స్పాట్ గోల్డ్ ధర ఔన్స్‌కు 5,000 డాలర్ల (సుమారు రూ. 4,15,000) మార్కును చేరుకుంటుంది. ఈ అంచనా నిజమైతే, 10 గ్రాముల బంగారం ధర సుమారు రూ. 1,56,458కి చేరుకునే అవకాశం ఉంది.

ఈ సంవత్సరం ఇప్పటికే 55 శాతం మేర పెరిగిన బంగారం ధరలు, సమీప భవిష్యత్తులో చిన్నపాటి 'దిద్దుబాటు ' రిస్క్‌ను ఎదుర్కొన్నప్పటికీ, 2026లో మాత్రం దీని భవిష్యత్తు మరింత ప్రకాశవంతంగా ఉంటుందని బ్యాంక్ ఆఫ్ అమెరికా ధీమా వ్యక్తం చేసింది.

వెండికి 'డబుల్' ధమాకా: కేజీ ధర రూ. 2 లక్షలు దాటే అవకాశం
బంగారంతో పాటు వెండి కూడా తన ప్రకాశాన్ని పెంచుకోనుంది. 2026 నాటికి వెండి ధర ఔన్స్‌కు 65 డాలర్ల (సుమారు రూ. 5,400) మైలురాయిని తాకవచ్చని బ్యాంక్ అంచనా వేసింది. దీని ప్రకారం, కిలో వెండి ధర రూ. 2,03,417కు పైగా పెరిగే అవకాశం ఉంది.

వరుసగా ఐదో సంవత్సరమూ వెండి మార్కెట్ సరఫరా కొరత (నిర్మాణాత్మక లోటు)తో ఉండటం దీనికి ప్రధాన కారణం. వచ్చే ఏడాది వెండి డిమాండ్ 11 శాతం తగ్గినప్పటికీ, నిరంతర సరఫరా కొరత కారణంగా ధరలు బలంగా ఉంటాయని బ్యాంక్ నొక్కి చెప్పింది. అయితే, స్వల్పకాలంలో మార్కెట్ అసమతుల్యతలు, అస్థిరత పెరిగే అవకాశం ఉందని బ్యాంక్ హెచ్చరిక కూడా జారీ చేసింది.

మొత్తం మీద, బ్యాంక్ ఆఫ్ అమెరికా అంచనాలు గనుక నిజమైతే, బంగారం, వెండిలో పెట్టుబడి పెట్టిన వారికి రాబోయే రెండేళ్లలో భారీ లాభాలు ఒనగూరడం ఖాయం. ఈ అంచనాలు ప్రపంచవ్యాప్తంగా పెట్టుబడిదారుల దృష్టిని ఆకర్షిస్తున్నాయి.

English summary

$5000 Gold is Imminent? Bank of America's Bold Prediction for 2026.