పాక్కు లాస్ట్ వార్నింగ్! ప్రపంచపటంలో ఉంటారా? చరిత్రలో కలిసిపోతారా?
భారతదేశ భద్రతతో చెలగాటమాడినా, సరిహద్దుల్లో ఉగ్రవాద రక్కసిని పెంచి పోషించినా ఉపేక్షించేది లేదని భారత ఆర్మీ చీఫ్ జనరల్ ఉపేంద్ర ద్వివేది పాకిస్థాన్కు అత్యంత భీకరమైన హెచ్చరిక జారీ చేశారు. భారత్కు వ్యతిరేకంగా ఉగ్రమూకలకు ఆశ్రయం కల్పిస్తూ కుట్రలు కొనసాగిస్తే, రాబోయే రోజుల్లో పాకిస్థాన్ "ప్రపంచ భౌగోళికంలో భాగం అవుతుందా.. లేక చరిత్ర పుటల్లో కలిసిపోతుందా" అని ఆ దేశమే తేల్చుకోవాలంటూ తీవ్ర స్వరంతో హెచ్చరించారు. శనివారం మనేక్షా సెంటర్లో 'యూనిఫాం అన్వీల్డ్' నిర్వహించిన 'సేనా సంవాద్' కార్యక్రమంలో పాల్గొన్న ఆర్మీ చీఫ్, సరిహద్దుల్లో ఉద్రిక్తతలు, భవిష్యత్తు సైనిక వ్యూహాలపై భారత సైన్యం యొక్క విశ్వరూపాన్ని ప్రపంచానికి చాటిచెప్పారు.
గతంలో పహల్గామ్లో అమాయక పర్యాటకుల ఊచకోతకు ప్రతిగా భారత సైన్యం శత్రుదేశంపై జరిపిన మెరుపుదాడి 'ఆపరేషన్ సింధూర్' మొదటి వార్షికోత్సవం ముగిసిన నేపథ్యంలో జనరల్ ద్వివేది ఈ వ్యాఖ్యలు చేయడం ప్రాధాన్యత సంతరించుకుంది. ఆపరేషన్ సింధూర్ సమయంలో భారత సాయుధ దళాలు పాకిస్థాన్, పాకిస్థాన్ ఆక్రమిత జమ్మూ కాశ్మీర్ (PoJK) లోని పలు ఉగ్రవాద మౌలిక సదుపాయాలపై గురితప్పని కచ్చితమైన దాడులు (Precision Strikes) చేశాయని ఆయన గుర్తుచేశారు. ఒకవేళ పొరుగుదేశం బుద్ధి మార్చుకోకుండా మళ్లీ తోక జాడిస్తే.. రాబోయే రోజుల్లో 'ఆపరేషన్ సింధూర్ సెకండ్ వెర్షన్' ఊహకందని తీవ్రస్థాయిలో ఉంటుందని, శత్రువు కోలుకోలేని విధంగా భారత సైన్య స్పందన ఉంటుందని రూఢీ చేశారు.
88 గంటల సమరం.. ప్రపంచానికి ఆధారాలు
రెండు అణ్వస్త్ర శక్తిగల పొరుగు దేశాల మధ్య దాదాపు 88 గంటల పాటు శ్వాస నిలిపేలా సాగిన ఆ చారిత్రాత్మక సైనిక సంఘర్షణ మే 10న ముగిసిందని, ఆ సమయంలో పాకిస్థాన్ గడ్డపై ఉన్న ఉగ్రవాద స్థావరాల ఉనికిని తిరుగులేని ఆధారాలతో సహా ప్రపంచం ముందు ఉంచామని జనరల్ ద్వివేది స్పష్టం చేశారు. "భారత ప్రభుత్వం ఎల్లప్పుడూ తన దేశ ప్రజల పురోగతి, శ్రేయస్సుపైనే దృష్టిపెడుతుంది. కానీ మా అభివృద్ధి మార్గంలో ఎవరైనా అడ్డంకులు సృష్టించాలని చూస్తే మాత్రం సహించే ప్రసక్తే లేదు" అని ఆయన నొక్కిచెప్పారు.
ఉగ్రవాది.. మద్దతుదారు ఇద్దరూ ఒకటే!
భారతదేశ సార్వభౌమత్వాన్ని దెబ్బతీయాలని చూసే ఉగ్రవాదులను మరియు వారికి వెన్నుదన్నుగా నిలిచే మద్దతుదారులను (పాక్ పాలకులను, సైన్యాన్ని) భారత్ ఒకేవిధంగా పరిగణిస్తుందని ఆర్మీ చీఫ్ తేల్చి చెప్పారు. ఉగ్రవాదాన్ని తుడిచిపెట్టే విషయంలో భారత్ ఎట్టి పరిస్థితుల్లోనూ వెనకడుగు వేయదని, శత్రువు స్థావరాల్లోకి దూసుకెళ్లి మరీ ఇరుగడ తీరుస్తామని బోర్డర్ హీట్ యాంగిల్లో గట్టి సంకేతాలు పంపారు. భారత ఆర్మీ చీఫ్ నోటి నుంచి వచ్చిన ఈ 'లాస్ట్ అండ్ ఫైనల్ వార్నింగ్' ఇప్పుడు ఇస్లామాబాద్లోని రక్షణ వర్గాలలో తీవ్ర వణుకు పుట్టిస్తోంది.
Click it and Unblock the Notifications
Sign in with Google