‘ఏయ్, నేను లోకల్.. నన్నే డబ్బు కట్టమంటావా?..’, టోల్ ప్లాజా ఉద్యోగినిపై వాహనదారుడి వీరంగం!

న్యూఢిల్లీ: 'ఏయ్, నేను లోకల్.. నన్నే టోల్ ఫీజు కట్టమంటావా?' అంటూ ఓ ఉద్యోగినిపై ఓ వాహనదారుడు దాడి చేసిన ఘటన గుర్గావ్ ఎక్స్‌ప్రెస్ హైవేపై గురువారం చోటుచేసుకుంది. ఈ ఘటనకు సంబంధించిన ద‌శ్యాలు సీసీ కెమెరాకు చిక్కాయి.

గుర్గావ్ ఎక్స్‌ప్రెస్ హైవేపై ఉన్న ఖేర్కీ దౌలా టోల్ ప్లాజా వద్ద ఉదయం పదకొండు గంటల ప్రాంతంలో ఈ ఘటన జరిగింది. అక్కడి బూత్ నంబర్ 23లో విధులు నిర్వహిస్తోన్న ఓ ఉద్యోగిని టోల్ ఫీజు చెల్లించమని అడిగిన పాపానికి ఓ వాహనదారుడు హంగామా సృష్టించాడు.

నేను లోకల్, నాకు టోల్ గీల్ ఏమీ ఉండదంటూ ఆ మహిళా ఉద్యోగిని దుర్భాషలాడాడు. అడ్డు వచ్చిన సిబ్బందిపై బూతు పురాణం విప్పాడు. చేయి లోపలికి చాచి ఆ మహిళా ఉద్యోగిని కొట్టాడు. అతడ్ని పట్టుకోవడానికి టోల్ ప్లాజా ఉద్యోగులంతా ముందుకు రావడంతో అక్కడ్నించి పారిపోయేందుకు ప్రయత్నించాడు.

#WATCH: Man argues & attempts to beat a female toll plaza employee in #Gurugram pic.twitter.com/QlhYun3x3i

— ANI (@ANI) December 7, 2017

అయితే అక్కడి భద్రతా సిబ్బంది అతడి కారుకు అడ్డంగా బారికేడ్లు అడ్డుపెట్టడంతో చివరికి దొరికిపోయాడు. దీంతో వారు అతడ్ని పోలీసులకు అప్పజెప్పారు. ఆ కాసేపు ఆ వాహనదారుడు చేసిన హల్‌చల్ మొత్తం సీసీ కెమెరాల్లో రికార్డయింది.

నిజానికి ఖేర్కీ దౌలా టోల్ ప్లాజా వద్ద ఇలాంటి ఘటనలు చోటు చేసుకోవడం ఇదేం కొత్తకాదు. నవంబరు 18వ తేదీన కూడా ఇలాగే ఓ మహిళా ఉద్యోగినిపై గుర్తు తెలియని వ్యక్తులు కొందరు వేధింపులకు పాల్పడ్డారు.

ఓ ఎస్‌యూవీలో వచ్చిన ఆ వ్యక్తులు తాము అధికార బీజేపీకి చెందిన వారమని, వెంటనే బారికేడ్ పైకెత్తాలంటూ ఆ మహిళా ఉద్యోగినిపై జులుం ప్రదర్శించారని టోల్ ప్లాజా పీఆర్వో కృపాల్ సింగ్ తెలియజేశారు.

మరో ఘటనలో.. అక్టోబరు 3న రాత్రి 2 గంటల సమయంలో బ్లాక్ స్కార్పియో వాహనంలో వచ్చిన ఓ వ్యక్తి టోల్ ప్లాజా ఉద్యోగులు టోల్ ఫీజు చెల్లించమని అడగ్గా వారిపై ఏకంగా కాల్పులే జరిపాడు. ఏదేమైనా ఈ టోల్ ప్లాజా వద్ద తరచూ గొడవలు చోటుచేసుకుంటూనే ఉన్నాయి.

English summary

On Thursday morning, a woman toll booth employee was harassed at Kherki Daula toll plaza in Gurgaon. The incident took place around 11:15 am today. The accused asked the toll booth operator to let him pass without paying the toll charges. She asked for the identification documents which agitated the man, and then he started hitting the woman toll operator. The operator was posted at booth number 23 when the accused asked for a free passage.