cyclone biparjoy : బిపర్ జోయ్ దెబ్బకు గుజరాత్ విలవిల-47 వేల మంది తరలింపు-రేపు తీరానికి..

గుజరాత్ కు బిపర్ జోయ్ తుపాన్ ముప్పు నానాటికీ తీవ్రమవుతోంది. అతి తీవ్ర నుంచి తీవ్ర తుపానుగా ప్రభావం తగ్గినప్పటికీ గుజరాత్ లోని సౌరాష్ట్ర, కచ్ తీరాలకు ఐఎండీ రెడ్ అలర్ట్ ఇచ్చింది. దీంతో ఈ రెండు ప్రాంతాల ప్రజలు ప్రాణాలు అరచేత్తో పట్టుకుని తుపాను ఎప్పుడు తీరం దాటుతుందని ఎదురు చూస్తున్నారు. తుపాను రేపు సాయంత్రం తీరం దాటుతుందని అంచనా వేస్తున్న నేపథ్యంలో గుజరాత్ సర్కార్ అన్ని విధానాలుగా అప్రమత్తమైంది.

రేపు కచ్‌లో తీవ్ర తుఫాను బీపర్‌జోయ్ తీరం దాటే అవకాశం ఉన్నందున గుజరాత్ ప్రభుత్వం 47,000 మందిని సురక్షిత ప్రాంతాలకు తరలించింది. తుఫాను తీరం దాటే సమయంలో బలమైన గాలులు, భారీ వర్షాలు కురుస్తాయని ఐఎండీ కచ్ , సౌరాష్ట్ర తీరప్రాంత జిల్లాలకు రెడ్ అలర్ట్ జారీ చేసింది.తుపాను గుజరాత్ తీరం వైపు దూసుకుపోవడంతో సౌరాష్ట్ర-కచ్ ప్రాంతంలోని కొన్ని ప్రాంతాల్లో బలమైన గాలులతో కూడిన భారీ వర్షాలు కురుస్తున్నాయి.

గత 24 గంటల్లో దేవభూమి ద్వారక, జామ్‌నగర్‌, జునాగఢ్‌, పోర్‌బందర్‌, రాజ్‌కోట్‌ జిల్లాల్లోని తొమ్మిది తాలూకాల్లో 50 మి.మీ కంటే ఎక్కువ వర్షపాతం నమోదైంది. ఇవాళ ఉదయం గుజరాత్ ముఖ్యమంత్రి భూపేంద్ర పటేల్ గుజరాత్‌లోని గాంధీనగర్‌లోని స్టేట్ ఎమర్జెన్సీ ఆపరేషన్ సెంటర్‌లో బిపర్ జోయ్ తుఫాను సంసిద్ధతపై సమీక్ష సమావేశం నిర్వహించారు. తుఫాను దాదాపు ఉత్తర-ఈశాన్య దిశగా కదులుతూ సౌరాష్ట్ర, కచ్, దానికి ఆనుకుని ఉన్న పాకిస్తాన్ తీరాలను మాండ్వి (గుజరాత్), కరాచీ (పాకిస్తాన్) మధ్య జాఖౌ పోర్ట్ (గుజరాత్) సమీపంలో రేపు సాయంత్రం అతి తీవ్రమైన తుఫానుగా మారే అవకాశం ఉంది.

తుపాను ప్రభావంతో గరిష్టంగా గంటకు 125-135 కి.మీ వేగం నుంచి 150 కి.మీ. వేగంతో గాలులు వీచే అవకాశాలున్నాయి.సౌరాష్ట్ర-కచ్ ప్రాంతంలోని తీర ప్రాంతాలలో ముఖ్యంగా కచ్, పోర్ బందర్, దేవభూమి ద్వారక జిల్లాల్లో బలమైన గాలులతో కూడిన భారీ వర్షాలు కురుస్తాయని వాతావరణ శాఖ అంచనా వేసింది. జూన్ 15న తుపాను గుజరాత్ తీరాన్ని సమీపించే కొద్దీ వర్షాల తీవ్రత పెరుగుతుందని పేర్కొంది. గుజరాత్ అధికారులు కోస్తా జిల్లాల్లో ఎన్డీఆర్ఎఫ్ 18 బృందాలు, 12 ఎస్టీఆర్ఎఫ్ బృందాలను మోహరించారు. అదనంగా తుఫాను తీరం దాటే సమయంలో జరిగే నష్టాలను తగ్గించే ప్రయత్నాల్లో బీఎస్ఎఫ్, ఆర్మీ, నేవీ కూడా పాల్గొంటున్నాయి.

English summary

gujarat govt has shifted more than 47000 people in wake cyclone biporjoy's landfall tomorrow