షాకింగ్ రిపోర్ట్.. ఇండియాలో టాప్ 10 'చెత్త' నగరాలు ఇవే..!

2016 లో కేంద్ర ప్రభుత్వం ప్రతిష్టాత్మకంగా తీసుకొచ్చిన స్వచ్ఛ భారత్ అభియాన్ లో భాగంగా ఏటా స్వచ్ఛ సర్వేక్షణ్ సర్వేను నిర్వహిస్తారు. ఈ సర్వేలో భాగంగా దేశంలోని నగరాల పనితీరును అంచనా వేసి, ఉత్తమ నగరాలకు అవార్డులను అందిస్తారు. అయితే తాజాగా స్వచ్చ్ సర్వేక్షణ్ 2024-2025 రిపోర్టులో నగరాల్లో పరిశుభ్రత ఆధారంగా నగరాల లిస్టును రిలీజ్ చేసింది. ఈ లిస్టులో ముంబై ఆఖరి స్థానంలో నిలిచింది. ముంబై మహానగరం 10 లక్షలు జనాభా దాటిన నగరాల లిస్టులో అత్యంత చెత్త నగరంగా 33 వ స్థానంలో నిలిచింది.

ముంబై నగరం.. డర్టీ సిటీ లిస్టులో దేశ రాజధాని దిల్లీని దాటేసింది. దిల్లీ 31 వ స్థానంలో ఉంది. ఈ సర్వేలో తమిళనాడులోని మధురై టాప్ లో ఉంది. మధురై ర్యాంకు 40 గా ఉంది. 39 వ స్థానంలో పంజాబ్ లోని లుథియానా, 38 వ స్థానంలో చెన్నై, ఝార్ఖండ్ లోని రాంచీ 37 వ స్థానంలో, బెంగళూరు 36 వ స్థానంలో, ధన్ బాద్ 35 వ స్థానంలో ఫరీదాబాద్ 34 వ స్థానంలో నిలిచాయి. ఇక శ్రీనగర్ 32 వ స్థానంలో ఉంది.

దాంతోపాటు దేశంలోనే స్వచ్ఛమైన నగరాల లిస్టును కూడా కేంద్రం ప్రకటించింది. తాజా రిపోర్టు ప్రకారం.. గుజరాత్ లోని అహ్మదాబాద్ దేశంలోనే స్వచ్చమైన నగరంగా టాప్ ప్లేస్ లో నిలిచింది. ఆ తర్వాతి స్థానాల్లో భోపాల్, లక్నో, రాయ్ పుర్, జబల్ పూర్ ఉన్నాయి. ఇంకా గ్రేటర్ హైదరాబాద్, పింప్రీ చించ్వాడ్, పుణె, జీవీఎంసీ విశాఖపట్నం, ఆగ్రా నగరాలు కూడా టాప్ ప్లేస్ లోనే ఉన్నాయి.

స్వచ్చ్ సర్వేక్షణ్ 2024-2025 రిపోర్టులో భాగంగా విజిబుల్ క్లీన్ నెస్, సాలిడ్ వేస్ట్ మేనేజ్ మెంట్, శానిటేషన్, యూస్డ్ వాటర్ మేనేజ్ మెంట్.. పలు పేరామీటర్స్ ఆధారంగా ఈ లిస్టును రూపొందిస్తారు. ఈ క్రమంలో ముంబై వాసులు సామాజిక మాధ్యమాల్లో నగరంలోని చెత్త ప్రాంతాలను ఫోటోలు, వీడియోల రూపంలో పోస్టు చేస్తున్నారు. రోడ్లపై నీరు నిలిచిపోవడం, పాట్ హోల్స్, బిల్డింగ్స్ నుంచి టాయిలెట్ వాటర్ లీకేజీ తదితర సమస్యలను సామాజిక మాధ్యమాల్లో పోస్టు చేస్తున్నారు.