2జీ స్పెక్ట్రమ్ కేసు: తీర్పుపై ఢిల్లీ హైకోర్టులో ఈడీ సవాల్, ఏం జరగబోతోంది?

న్యూఢిల్లీ: 2జీ స్పెక్ట్రమ్‌ కుంభకోణం కేసులో సీబీఐ ప్రత్యేక న్యాయస్థానం ఇచ్చిన తీర్పుపై సోమవారం ఎన్‌ఫోర్స్‌మెంట్‌ డైరెక్టరేట్‌(ఈడీ) ఢిల్లీ హైకోర్టును ఆశ్రయించింది. ఈ కేసులో టెలికాం మాజీ మంత్రి ఎ.రాజా, డీఎంకే ఎంపీ కనిమొళి సహా నిందితులందరినీ నిర్దోషులుగా తేలుస్తూ గతేడాది డిసెంబరులో సీబీఐ స్పెషల్ కోర్టు తీర్పు వెల్లడించిన విషయం తెలిసిందే. ఈ తీర్పును సవాల్‌ చేస్తూ ఢిల్లీ హైకోర్టులో ఈడీ పిటిషన్‌ దాఖలు చేసినట్లు తెలుస్తోంది.

యూపీఏ ప్రభుత్వ హయాంలో ఈ 2జీ స్పెక్ర్టమ్ స్కాం చోటుచేసుకుంది. ఆ సమయంలో డీఎంకేకు చెందిన ఎ. రాజా టెలికాం శాఖ మంత్రిగా వ్యవహరించారు. ఆయన నేతృత్వంలో 2జీ స్పెక్ట్రమ్ కేటాయింపులో భారీ ఎత్తున అవినీతి జరిగిందని కంప్ట్రోలర్‌ అండ్‌ ఆడిటర్‌ జనరల్‌(కాగ్‌) ఆరోపించింది. ఈ అవినీతి వల్ల ప్రభుత్వానికి రూ.1.76 లక్షల కోట్ల నష్టం వాటిల్లినట్లు కాగ్ తన నివేదికలో పేర్కొంది.

కాగ్‌ ఆరోపణలతో 2010లో ఎ. రాజాను అప్పటి యూపీఏ ప్రభుత్వం పదవి నుంచి తప్పించింది. అనంతరం ఈ కుంభకోణంపై సీబీఐ, ఈడీ దర్యాప్తు చేపట్టాయి. రాజా, డీఎంకే ఎంపీ కనిమొళి సహా 17 మంది నేతలు, కార్పొరేట్‌ సంస్థల అధికారులపై ఛార్జ్‌షీట్‌ దాఖలు చేశాయి. 2011లో రాజాను అరెస్టు కూడా చేశారు. ఏడాది పాటు జైల్లో ఉన్న రాజా ఆ తర్వాత బెయిల్‌పై విడుదలయ్యారు.

ఈ కేసుకు సంబంధించి గతేడాది డిసెంబరులో సీబీఐ ప్రత్యేక న్యాయస్థానం అనూహ్య తీర్పు వెల్లడించింది. ఈ కేసులో రాజా, కనిమొళితో పాటు నిందితులందరినీ నిర్దోషులుగా కోర్టు ప్రకటించింది. నిందితులపై ఆరోపణలను రుజువు చేయడంలో ప్రాసిక్యూషన్‌ విఫలమైందని న్యాయస్థానం ఆ సందర్భంగా వ్యాఖ్యానించింది. ఫలితంగా ఈ కేసు నుంచి వారంతా బయటపడ్డారు. అయితే తాజాగా ఈడీ ఈ తీర్పును ఢిల్లీ హైకోర్టులో సవాల్‌ చేయడంతో మళ్లీ ఈ వ్యవహారం సర్వత్రా చర్చనీయాంశంగా మారింది.

English summary

The Enforcement Directorate (ED) on Monday has challenged the acquittal of former telecom minister A Raja, DMK leader Kanimozhi and others in 2G spectrum scam case. In December, 2017, Raja, Kanimozhi and all 19 accused were acquitted in the politically-sensitive 2G spectrum allocation scam cases by a special court in Delhi which held that the prosecution "miserably failed" to prove the charges. Besides Raja and Kanimozhi, Special Judge OP Saini also acquitted Shahid Balwa, Vinod Goenka, Asif Balwa, Rajiv Aggarwal, Karim Morani, P Amirtham and Sharad Kumar in connection with the case.Special Judge OP Saini had in his 1,552-page verdict said, "I have no hesitation in holding that the prosecution has miserably failed to prove any charge against any of the accused, made in its well-choreographed chargesheet. All 17 accused are acquitted." "I have absolutely no hesitation in holding that the prosecution has miserably failed to prove any charge against any of the accused, made in its well choreographed chargesheet," the judge had said.