LYCA Productionsపై ఈడీ మెరుపుదాడి- కోలీవుడ్ ఉక్కిరిబిక్కిరి
చెన్నై: తమిళనాడులో ఎన్ఫోర్స్మెంట్ డైరెక్టరేట్ అధికారులు మెరుపు దాడులకు దిగారు. ప్రముఖ చలనచిత్ర నిర్మాణ సంస్థ లైకా ప్రొడక్షన్స్పై దాడులు సాగిస్తోన్నారు. ఈ తెల్లవారు జాము నుంచి ఈ దాడులు, సోదాలు కొనసాగుతున్నాయి. చెన్నైలోని లైకా ప్రొడక్షన్స్ చిత్ర నిర్మాణ సంస్థ కార్యాలయంతో పాటు ఆ సంస్థ యాజమానుల నివాసాల్లో ఏకకాలంలో ఈడీ అధికారులు తనిఖీలు సాగిస్తోన్నారు.
లైకా ప్రొడక్షన్స్ అధినేత, ప్రముఖ నిర్మాత ఏ సుబాస్కరన్ నివాసంలో కూడా ఈడీ అధికారులు విస్తృతంగా తనిఖీలు చేపట్టినట్లు సమాచారం. భారీ సినిమాలకు పెట్టింది పేరు లైకా ప్రొడక్షన్స్. వందల కోట్ల రూపాయల బడ్జెట్తో సినిమాలను తీసే నిర్మాణ సంస్థగా గుర్తింపు ఉంది. ఈ మధ్యే విడుదలైన పొన్నియన్ సెల్వన్-2ను నిర్మించింది ఈ సంస్థే. అరుణ్ విజయ్ హీరోగా ప్రస్తుతం మిషన్ ఛాప్టర్ సినిమాను నిర్మిస్తోంది.
ప్రస్తుతం షూటింగ్ జరుపుకొంటోన్న ఇండియన్ 2 సినిమా కూడా లైకా ప్రొడక్షన్స్కు చెందినదే. భారతీయుడుకు సీక్వెల్గా శంకర్ దర్శకత్వంలో ఈ మూవీ తెరకెక్కుతోంది. కమల్ హాసన్ హీరో. ఐశ్వర్య రజినీకాంత్, విష్ణువిశాల్, విక్రాంత్లతో లాల్ సలామ్, అజిత్ కుమార్తో విదా ముయార్చి సినిమాలను తెరకెక్కిస్తోంది. ఆయా సినిమాలన్నీ కూడా సెట్స్పై ఉన్నాయి.
ఈ పరిస్థితుల్లో ఎన్ఫోర్స్మెంట్ డైరెక్టరేట్ అధికారులు లైకా ప్రొడక్షన్స్ కార్యాలయాలపై ఏకకాలంలో మెరుపుదాడులకు దిగడం ప్రాధాన్యతను సంతరించుకుంది. ఈ అనూహ్య ఘటనతో తమిళ చిత్ర పరిశ్రమల ఉలిక్కి పడింది. దాడుల సందర్భంగా పలు కీలక డాక్యుమెంట్లను ఈడీ అధికారులు స్వాధీనం చేసుకున్నట్లు చెబుతున్నారు. దీనికి సంబంధించిన పూర్తి సమాచారం ఇంకా వెలువడాల్సి ఉంది.
Click it and Unblock the Notifications
Sign in with Google