సుప్రీంకోర్టు న్యాయమూర్తులుగా ఐదుగురు ప్రమాణ స్వీకారం..
దేశ అత్యున్నత న్యాయస్థానం అయిన సుప్రీంకోర్టులో ఐదుగురు కొత్త న్యాయమూర్తులు బాధ్యతలు స్వీకరించారు. జస్టిస్ శీల్ నాగు, జస్టిస్ శ్రీ చంద్రశేఖర్, జస్టిస్ సంజీవ్ సచ్దేవ, జస్టిస్ అరుణ్ పళ్లి, సీనియర్ న్యాయవాది వి.ఎస్. మోహన సుప్రీంకోర్టు న్యాయమూర్తులుగా ప్రమాణ స్వీకారం చేశారు. ఈ సందర్భంగా సుప్రీంకోర్టు ఆడిటోరియంలో ప్రత్యేక కార్యక్రమం నిర్వహించగా, భారత ప్రధాన న్యాయమూర్తి (సీజేఐ) Surya Kant వారితో ప్రమాణం చేయించారు.
ఘనంగా ప్రమాణ స్వీకార కార్యక్రమం..
సుప్రీంకోర్టు ప్రాంగణంలో జరిగిన ఈ కార్యక్రమానికి సుప్రీంకోర్టులోని ఇతర న్యాయమూర్తులు, న్యాయవాదులు, కోర్టు అధికారులు, కుటుంబ సభ్యులు హాజరయ్యారు. కొత్త న్యాయమూర్తుల నియామకంతో దేశ అత్యున్నత న్యాయస్థానంలో న్యాయ వ్యవస్థ మరింత బలోపేతం అవుతుందనే అభిప్రాయం వ్యక్తమవుతోంది.
గత నెల 27న సుప్రీంకోర్టు కొలీజియం ఈ ఐదుగురి పేర్లను సిఫార్సు చేసింది. కొలీజియం సిఫార్సులను పరిశీలించిన కేంద్ర ప్రభుత్వం వెంటనే ఆమోదం తెలపగా, రాష్ట్రపతి Droupadi Murmu సోమవారం నియామకాలకు గ్రీన్ సిగ్నల్ ఇచ్చారు. అనంతరం కేంద్ర న్యాయశాఖ అధికారిక ఉత్తర్వులు జారీ చేసింది.
ఎవరు ఈ కొత్త న్యాయమూర్తులు?
సుప్రీంకోర్టుకు పదోన్నతి పొందిన నలుగురు హైకోర్టు ప్రధాన న్యాయమూర్తులు దేశంలోని వివిధ హైకోర్టుల్లో కీలక బాధ్యతలు నిర్వహించారు.
జస్టిస్ శీల్ నాగు - పంజాబ్ & హర్యానా హైకోర్టు ప్రధాన న్యాయమూర్తి
జస్టిస్ శ్రీ చంద్రశేఖర్ - బొంబాయి హైకోర్టు ప్రధాన న్యాయమూర్తి
జస్టిస్ సంజీవ్ సచ్దేవ - మధ్యప్రదేశ్ హైకోర్టు ప్రధాన న్యాయమూర్తి
జస్టిస్ అరుణ్ పళ్లి - జమ్మూ కాశ్మీర్ & లడఖ్ హైకోర్టు ప్రధాన న్యాయమూర్తి
వీరివెంట సీనియర్ న్యాయవాది వి.ఎస్. మోహనను నేరుగా బార్ నుంచి సుప్రీంకోర్టు న్యాయమూర్తిగా నియమించడం విశేషంగా మారింది.
మహిళా ప్రాతినిధ్యానికి ఊతం..
వి.ఎస్. మోహన నియామకం ప్రత్యేక ప్రాధాన్యత సంతరించుకుంది. బార్ నుంచి నేరుగా సుప్రీంకోర్టుకు నియమితులైన రెండో మహిళగా ఆమె చరిత్ర సృష్టించారు. అలాగే ప్రస్తుతం సుప్రీంకోర్టులో మహిళా న్యాయమూర్తుల సంఖ్య కూడా పెరిగింది.
37కు చేరిన సుప్రీంకోర్టు బలం
ఈ ఐదుగురు కొత్త న్యాయమూర్తుల చేరికతో సుప్రీంకోర్టు పనిచేస్తున్న న్యాయమూర్తుల సంఖ్య 37కు చేరింది. ఇటీవల కేంద్ర ప్రభుత్వం ఆర్డినెన్స్ ద్వారా సుప్రీంకోర్టు ఆమోదిత న్యాయమూర్తుల సంఖ్యను 34 నుంచి 38కు పెంచింది. ప్రస్తుతం ఒక ఖాళీ మాత్రమే మిగిలి ఉండటంతో సుప్రీంకోర్టు దాదాపు పూర్తి సామర్థ్యంతో పనిచేసే స్థితికి చేరుకుంది.
పెండింగ్ కేసుల పరిష్కారానికి ఊరట
దేశవ్యాప్తంగా వేలాది కేసులు సుప్రీంకోర్టులో పెండింగ్లో ఉన్న నేపథ్యంలో కొత్త న్యాయమూర్తుల నియామకం కీలకంగా మారింది. న్యాయమూర్తుల సంఖ్య పెరగడంతో కేసుల విచారణ వేగవంతమయ్యే అవకాశం ఉందని న్యాయ నిపుణులు అభిప్రాయపడుతున్నారు. అలాగే వివిధ రాజ్యాంగ, ప్రజా ప్రయోజన వ్యాజ్యాలు, కీలక న్యాయపరమైన అంశాలపై త్వరితగతిన విచారణ జరిగే అవకాశాలు కూడా మెరుగుపడనున్నాయి.
Click it and Unblock the Notifications
Sign in with Google