ఫుల్ జోష్ లో బీజేపీ.. 501 కిలోల లడ్డూలు ఆర్డర్‌..

బిహార్ అసెంబ్లీ ఎన్నికలకు పోగింగ్ ముగిసింది. ఫలితాలు ఈ నెల 14న విడుదల కానున్నాయి. అయితే దాదాపు అన్ని ఎగ్జిట్ పోల్స్ ఎన్డీయే కూటమి విజయం సాధిస్తుందని అంచనా వేశాయి. దీంతో కాషాయపార్టీ శ్రేణుల్లో కొత్త ఉత్సాహం నెలకొంది. ఈ నెల 14 న ఫలితాలు వెల్లడైన వెంటనే సంబరాలు చేసుకునేందుకు పట్నాలో 501 కిలోల లడ్డూలను ఆర్డర్ చేసినట్లు తెలుస్తోంది. ఇదే విషయంపై ఓ బీజేపీ నేత మాట్లాడుతూ.. ఫలితాల రోజు తాము దసరా, దీపావళి, హోలీ, ఈద్ పండగలు జరుపుకుంటామని తెలిపారు. ఎన్డీయే కూటమి అభివృద్ధి ఫలాలకే ప్రజలు జై కొట్టారని పేర్కొన్నారు. మరోవైపు ఆర్జేడీ నేత తేజస్వీ యాదవ్ ఈ ఎగ్జిట్ పోల్స్ అంచనాలను ఖండించారు. తామే విజయం సాధిస్తామని ధీమా వ్యక్తం చేశారు.

ఇక బిహార్ ఎగ్జిట్ పోల్స్ ఫలితాలను ఓ సారి గమనిస్తే.. బిహార్ లో మరోసారి ఎన్​డీఏ కూటమి విజయం సాధిస్తుందని దాదాపు అన్ని సర్వే సంస్థలు వెల్లడించాయి. నీతీశ్ కుమార్ నేతృత్వంలోని ఎన్​డీఏ కూటమి 140 నుంచి 160 సీట్లు గెలుచుకుంటుందని అనేక సర్వేలు చెబుతున్నాయి. ఇక మహాగఠ్ బంధన్ కు మాత్రం 100లోపే సీట్లు ఉండే అవకాశం ఉందని సర్వే సంస్థలు వివరిస్తున్నాయి. పీపుల్స్‌ పల్స్‌ సర్వే ఎన్​డీయే కూటమికి 133- 159 సీట్లు వస్తాయని పేర్కొంది. మహాగఠ్​బంధన్​ కు 75- 101 మధ్యలో సీట్లు రావచ్చని తెలిపింది. ఇక దైనిక్‌ భాస్కర్‌ సర్వే.. ఎన్​డీయూకు 145-160 సీట్లు.. మహాగఠ్​బంధన్ కు 73-91 సీట్లు వస్తాయని అంచనా వేసింది. అలాగే చాణక్య స్ట్రాటజీస్‌ సంస్థ.. ఎన్​డీయే కు 130- 138 సీట్లు అలాగే మహాగఠ్​బంధన్ కు 100- 108 సీట్లు వస్తాయని స్పష్టం చేసింది.

ఇక జేవీసీ పోల్స్‌ సర్వే చూస్తే.. ఎన్​డీయేకు 135- 150 సీట్లు అలాగే మహాగఠ్​బంధన్​ కు 88- 103 సీట్లు వచ్చే అవకాశం ఉందని స్పష్టం చేశాయి. ఇక బిహార్‌ లోని 243స్థానాలు ఉండగా ఈనెల 6వ తేదీన 121స్థానాలకు తొలివిడత పోలింగ్ జరిగింది. ఈ నెల 11న మిగిలిన స్థానాలకు రెండో విడత పోలింగ్ పూర్తయింది. ఈ నెల 14 న తుది ఫలితాలు విడుదల కానున్నాయి.