భారత్-ఫ్రాన్స్ మధ్య 17 ఒప్పందాలు: 36 రాఫెల్స్ జెట్స్ కొనుగోలు

ప్యారిస్: భారత్‌లో రక్షణ, శాస్త్ర సాంకేతిక, మౌలిక వసతుల రంగాల్లో భారీ పెట్టుబడులు పెట్టేందుకు ఫ్రాన్స్ అంగీకరించింది. వివిధ రంగాల్లో దాదాపు రూ.13,200 కోట్ల పెట్టుబడులు పెట్టేందుకు అంగీకారం కుదిరింది. భారత వైమానిక దళం అవసరాలను దృష్టిలో పెట్టుకుని ఇప్పటికే ఎగరడానికి సిద్ధంగా ఉన్న 36 రఫాలే యుద్ధ విమానాలను కొనుగోలు చేయనున్నట్లు ప్రధాని నరేంద్ర మోడీ శుక్రవారం ప్రకటించారు.

మూడు నగరాలను స్మార్ట్ సిటీలుగా మార్చేందుకు ఫ్రాన్స్ ముందుకొచ్చింది. ఎలిసీ ప్యాలెస్‌లో ఫ్రాన్స్ అధ్యక్షుడు ప్రాంకోయిస్ హోలాండ్‌లో శిఖరాగ్ర చర్చల అనంతరం ఆయనతో కలిసి సంయుక్తంగా ఏర్పాటు చేసిన మీడియా సమావేశంలో మోడీ ఈ ప్రకటన చేశారు. రెండు దేశాల మధ్య సంబంధాలను సమీక్షించిన ఇద్దరు నేతలు, ఆర్థిక, వాణిజ్య, శాస్త్రసాంకేతిక, సాంస్కృతిక, అణువిద్యుత్, విద్య తదితర రంగాల్లో సంబంధాలను మరింత పెంపొందించుకోవాలని నిర్ణయించారు.

ద్వైపాక్షికం, అంతర్జాతీయంగా భారత్‌కు ప్రాన్స్ నమ్మకమైన భాగస్వామి అని ప్రధాని మోడీ అన్నారు. రెండుదేశాల బంధం సుదీర్ఘమైనదేకాకుండా ఎంతో శక్తిమంతమైందని తెలిపారు. ఫ్రాన్స్ అధ్యక్ష భవనం ఎలిసీ ప్యాలెస్‌లో ఆ దేశాధ్యక్షుడు హొలాండేతో కలిసి మీడియా సమావేశంలో మాట్లాడిన మోడీ, తనకు ఘనస్వాగతం పలికిన ఫ్రాన్స్ ప్రభుత్వానికి, ప్రజలకు కృతజ్ఞతలు తెలిపారు. ప్రపంచంలో పెద్ద ప్రజాస్వామ్యదేశాలపై భారత్, ఫ్రాన్స్ ఒకేరకమైన విలువలు, సిద్ధాంతాలను అనుసరిస్తున్నాయన్నారు.

హొలాండేతో పలు అంశాలపై విస్తృతస్థాయిలో చర్చలు జరిపానని చెప్పారు. ఒక పథకంగానే కాకుండా గొప్ప ఆశయంగా చేపట్టిన మేక్ ఇన్ ఇండియా కార్యక్రమంలో రక్షణ రంగంలో సహకారానికి హొలాండే హామీ ఇచ్చారని తెలిపారు. ఎగిరేందుకు సిద్ధంగా ఉన్న 36 రాఫెల్ యుద్ధవిమానాలు కొనుగోలు చేస్తామని హొలాండేకు తెలిపానని, వీలైనంత త్వరగా వాటిని అందించాలని కోరినట్లు వివరించారు.

భారత్‌లో విద్యాభ్యాసాన్ని పూర్తిచేసిన ఫ్రెంచ్ విద్యార్థులు ఆ తర్వాత కూడా పని అనుభవంకోసం భారత్‌లోనే ఉండేందుకు అనుమతిస్తామని తెలిపారు. భారత్‌లో భారీగా పెట్టుబడులు పెట్టాలని ఫ్రాన్స్ కంపెనీలను మోడీ ఆహ్వానించారు.

భారత్ అభివృద్ధికి అన్నిరకాలుగా సహాయ సహకారాలు అందిస్తామని ఫ్రాన్స్ అధ్యక్షుడు ఫ్రాంకోయిస్ హొలాండే హామీ ఇచ్చారు. రెండు దేశాల మధ్య అనుబంధం కేవలం ఆర్థికాంశాలకు మాత్రమే పరిమితంకాదని, భారత్, ఫ్రాన్స్‌కు అంతర్జాతీయ బాధ్యతలున్నాయని తెలిపారు. ఐక్యరాజ్యసమితి భద్రతా మండలిలో భారత్ శాశ్వత సభ్యత్వానికి ఫ్రాన్స్ మద్దతిస్తుందని ప్రకటించారు. శాంతియుత వాతావరణం, స్థిరత్వం కోసం భారత్, ఫ్రాన్స్ కలిసి పనిచేస్తున్నాయని తెలిపారు.

English summary

In a major fillip for India-France ties, India said on Friday that it will buy 36 Rafale fighter jets in fly-away condition as both sides also pushed for early conclusion of techno-commercial talks on the Jaitapur nuclear power plant and inked 17 agreements as Prime Minister Narendra Modi held talks with French President Francois Hollande here.