ఎన్సీపీ నేత, మాజీ మంత్రి బాబా సిద్ధిక్ దారుణ హత్య
ముంబై: ఎన్సీపీ సీనియర్ నేత బాబా సిద్ధిక్పై శనివారం రాత్రి దుండగులు కాల్పులు జరిపారు. ఉదరభాగంలో మూడు రౌండ్లు కాల్పులు జరిపినట్లు తెలుస్తోంది. వెంటనే ముంబైలోని లీలావతి ఆస్పత్రికి తరలించగా, చికిత్స పొందుతూ కన్నుమూశారు. ముగ్గురు దుండగులు ఆయనపై కాల్పులు జరిపినట్లు పోలీసులు అనుమానిస్తున్నారు. అందులో ఇద్దరిని అదుపులోకి తీసుకున్నారు.
అజిత్ పవార్ వర్గం నాయకుడు అయిన బాబా సిద్ధిఖీ, తన కుమారుడు ఎమ్మెల్యే జిషాన్ సిద్ధిఖీ కార్యాలయం వెలుపల ఉండగా శనివారం రాత్రి ముగ్గురు గుర్తు తెలియని దుండగులు కాల్పులు జరిపారు. దీంతో తీవ్ర గాయాలపాలైన సిద్దిక్ ను హుటాహుటిన ఆస్పత్రికి తరలించారు. చికిత్స పొందుతూ ఆయన అక్కడే కన్నుమూశారు.
దాదాపు ఐదు దశాబ్దాలపాటు కాంగ్రెస్ పార్టీలో ఉన్న సిద్ధిక్.. కొన్ని నెలల కిందట అజిత్ పవార్ నాయకత్వంలోని ఎన్సీపీలో చేరారు. ఓ వైపు రాజకీయ నాయకుడిగా ఉంటూనే తరచూ గ్రాండ్ పార్టీలు ఏర్పాటు చేసి బాలీవుడ్ సెలబ్రిటీలకు ఆతిథ్యం ఇచ్చేవారు. ఓ సందర్భంలో షారుక్ ఖాన్, సల్మాన్ ఖాన్ లను దగ్గరకు చేర్చి అందర్నీ ఆశ్చర్యానికి గురిచేశారు సిద్దిక్.
కాగా, లీలావతి ఆసుపత్రి అధికారిక ప్రకటనలో బాబా సిద్ధిక్ మరణాన్ని ధృవీకరించింది. సిద్దిక్ దారుణ హత్య ఘటన మహారాష్ట్ర రాజకీయాల్లో కలకలం రేపుతోంది. బాబా సిద్ధిక్ పై కాల్పుల ఘటన ముంబైలోని రాజకీయ వర్గాలను దిగ్భ్రాంతికి గురిచేసింది.
సిద్ధిక్పై దాడి ముంబైలోని రాజకీయ ప్రముఖులలో భద్రతపై ఆందోళనలను లేవనెత్తింది. ఇలాంటి హింసాత్మక చర్యల నుంచి నాయకులను రక్షించేందుకు భద్రతా చర్యలు పెంచాలని పలువురు కోరుతున్నారు. ఈ సంఘటన రాజకీయ హింస, సమాజంపై దాని ప్రభావంపై చర్చలకు దారితీసింది. త్వరలో మహారాష్ట్రలో అసెంబ్లీ ఎన్నికలు జరగనున్న క్రమంలో ఈ ఘటన రాజకీయంగా చర్చనీయాంశంగా మారింది.
మరోవైపు, కాల్పుల ఘటనపై పోలీసులు దర్యాప్తు చేపట్టారు. కాల్పులకు సంబంధించిన సమాచారం తెలిసిన వారు ఎవరైనా ముందుకు రావాలని పోలీసులు కోరుతున్నారు. ఈ కేసును త్వరితగతిన పరిష్కరించి బాధ్యులను న్యాయస్థానం ముందుకు తీసుకురావడానికి ప్రజల సహకారం దోహదపడుతుందని పోలీసులు చెబుతున్నారు.
Click it and Unblock the Notifications
Sign in with Google