Chhattisgarh survey : ఈసారి ఛత్తీస్ ఘడ్ లో గెలిచేదెవరు ? తేల్చేసిన పీపుల్స్ పల్స్ సర్వే..!

ఈ ఏడాది అసెంబ్లీ ఎన్నికలు జరిగే ఐదు రాష్ట్రాల్లో ఒకటైన ఛత్తీస్ ఘడ్ లో ఎవరు గెలవబోతున్నారనే అంశంపై అప్పుడే సర్వేలు మొదలైపోయాయి. ప్రస్తుతం రాష్ట్రంలో అధికారంలో ఉన్న కాంగ్రెస్ పార్టీ మరోసారి అధికారాన్ని నిలబెట్టుకుంటుందా లేక బీజేపీ పుంజుకుని అధికారాన్ని కైవసం చేసుకుంటుందా అన్న చర్చ సాగుతోంది. వచ్చే ఏడాది సార్వత్రిక ఎన్నికలు జరగనున్న నేపథ్యంలో దేశంలో మారుతున్న పరిస్ధితుల్లో ఛత్తీస్ ఘడ్ ప్రజలు ఎవరివైపు మొగ్గు చూపుతున్నారనే దానిపై ఆసక్తి నెలకొంది.

ఛత్తీస్ ఘడ్ లో ఈ ఏడాది జరిగే అసెంబ్లీ ఎన్నికలపై హైదరాబాద్ కు చెందిన పీపుల్స్ పల్స్ సంస్ధ సర్వే చేపట్టింది. పీపుల్స్ పల్స్ మూడ్ సర్వే పేరుతో చేపట్టిన ఈ సర్వే ఫలితాల్ని విడుదల చేసింది. ఛత్తీస్ ఘడ్ లో జూన్ నెలలో నిర్వహించిన ఈ సర్వేలో 3 వేల శాంపిల్స్ సేకరించింది. ప్రతీ అసెంబ్లీ నియోజకవర్గం నుంచి 35 నుంచి 40 శాంపిల్స్ సేకరించారు. ఈ సర్వే ఫలితాల్ని విశ్లేషించి తుది రిపోర్ట్ ఇవాళ ఇచ్చింది.

90 సీట్లున్న ఛత్తీస్ ఘడ్ అసెంబ్లీలో సాధారణ మెజారిటీ సాధించి అధికారం కైవసం చేసుకోవాలంటే మ్యాజిక్ మార్క్ 46 సీట్లు సాధించాల్సి ఉంటుంది. ఈసారి పీపుల్స్ పల్స్ మూడ్ సర్వే అంచనాల ప్రకారం కాంగ్రెస్ పార్టీ మరోసారి అధికారం నిలబెట్టుకోబోతున్నట్లు తేలింది. కాంగ్రెస్ కు 53 నుంచి 60 సీట్లు లభించవచ్చని సర్వేలో తేలింది. అలాగే విపక్ష బీజేపీ 20 నుంచి 27 సీట్లకు పరిమితం కాబోతున్నట్లు తేలింది.

కాంగ్రెస్ పార్టీ 46 శాతం ఓట్లు సాధించి అధికారం నిలబెట్టుకోబోతున్నట్లు పీపుల్స్ పర్స్ సర్వే తేల్చింది. బీజేపికి 38 శాతం ఓట్లు లభించబోతున్నాయి. బీఎస్పీ, ఇండిపెండెంట్లకు రెండు సీట్లు దక్కే అవకాశమున్నట్లు తెలుస్తోంది. సీఎం భూపేష్ భగేల్ కు ఉన్న ప్రజాదరణే కాంగ్రెస్ అధికారం నిలబెట్టుకునేందుకు ప్రధాన కారణంగా నిలవబోతోంది. భగేల్ ప్రయోగిస్తున్న ప్రాంతీయ కార్డు కాంగ్రెస్ కు మరోసారి విజయాన్ని కట్టబెట్టబోతున్నట్లు తెలుస్తోంది. బీజేపీ హిందూత్వ కార్డును కాంగ్రెస్ ఛత్తీస్ ఘరియా(ఛత్తీస్ ఘడ్ వాసులు) కార్డు అధిగమించబోతోంది. అలాగే సంక్షేమ పథకాల అమలు కూడా కీలకంగా మారుతోంది.

English summary

peoples pulse's recent mood survey suggested that congress party will retain power in the upcoming Chhattisgarh polls.