మనీ ఆర్డర్ ఎకానమీకి షాక్: మే 4 తర్వాత కొత్త సర్కార్కు చుక్కలే!
కేరళ ఆర్థిక వ్యవస్థకు వెన్నెముకగా నిలిచే 'మనీ ఆర్డర్ ఎకానమీ' ఇప్పుడు ఒక చారిత్రాత్మక సంధిగ్ధంలో పడింది. ఒకవైపు రికార్డు స్థాయి విదేశీ నిధులతో కేరళ ఖజానా కళకళలాడుతుంటే, మరోవైపు పశ్చిమాసియాలో ముసురుతున్న యుద్ధ మేఘాలు ఆ రాష్ట్ర భవిష్యత్తుపై నీలినీడలు కమ్ముకునేలా చేస్తున్నాయి. మే 4న వెలువడనున్న ఎన్నికల ఫలితాల తర్వాత కేరళలో కొలువుదీరబోయే కొత్త ప్రభుత్వానికి ఇది కేవలం రాజకీయ విజయం మాత్రమే కాదు, నిప్పుల మీద నడక వంటి ఆర్థిక సవాలు కూడా.
కేరళ మైగ్రేషన్ సర్వే (KMS) 2023 వెల్లడించిన గణాంకాలు విస్మయానికి గురిచేస్తున్నాయి. 2018లో రూ.85,092 కోట్లుగా ఉన్న విదేశీ నిధులు, 2023 నాటికి ఏకంగా రూ.2,16,893 కోట్లకు చేరుకున్నాయి. కేవలం ఐదేళ్లలో 154.9% వృద్ధి సాధించడం సామాన్యమైన విషయం కాదు. రాష్ట్ర నికర ఆదాయంలో ఈ రెమిటెన్స్ల వాటా 23.2 శాతంగా ఉందంటే, కేరళ ఆర్థిక చక్రం ఎంతలా ప్రవాసుల సంపాదనపై ఆధారపడి ఉందో అర్థం చేసుకోవచ్చు. అయితే, ఈ ఆదాయంలో 90 శాతం వాటా గల్ఫ్ దేశాల నుంచే వస్తుండటమే ఇప్పుడు ఆందోళన కలిగిస్తున్న ప్రధానాంశం.
ఇరాన్ యుద్ధం: కేరళకు సెగ!
ఫిబ్రవరిలో ఇరాన్పై జరిగిన దాడులు, తదనంతరం మధ్యప్రాచ్యంలో నెలకొన్న ఉద్రిక్త పరిస్థితులు మలయాళీల గుండెల్లో రైళ్లు పరిగెత్తిస్తున్నాయి. ఒకవేళ ఇరాన్ యుద్ధం దీర్ఘకాలం కొనసాగితే కేరళకు వచ్చే నిధుల్లో 20 శాతం వరకు కోత పడే అవకాశం ఉందని ఆర్థిక నిపుణులు హెచ్చరిస్తున్నారు. గల్ఫ్ దేశాల్లోని చమురు రంగాలు, నిర్మాణం, ఆతిథ్య రంగాల్లో లక్షలాది మంది కేరళీయులు పనిచేస్తున్నారు. యుద్ధం వల్ల ఈ రంగాలు కుదేలైతే, రూపాయి విలువ పడిపోయి, రాష్ట్రానికి వచ్చే ఆదాయం గణనీయంగా తగ్గిపోతుంది. ఇది కేరళ అప్పుల భారాన్ని మరింత పెంచి, ఆర్థిక వ్యవస్థను అగాధంలోకి నెట్టే ప్రమాదం ఉంది.
తగ్గుతున్న లబ్ధిదారుల సంఖ్య.. పెరుగుతున్న అంతరం!
మరో ఆసక్తికరమైన, ఆందోళనకరమైన విషయం ఏమిటంటే, రాష్ట్రానికి వచ్చే మొత్తం నిధులు పెరిగినా, ఆ డబ్బు అందుకుంటున్న కుటుంబాల శాతం తగ్గింది. 2018లో 16 శాతం కుటుంబాలకు విదేశీ సొమ్ము అందేది, కానీ అది ఇప్పుడు 12 శాతానికి పడిపోయింది. అంటే ఆదాయం కేవలం కొద్దిమంది చేతుల్లోనే కేంద్రీకృతమవుతోంది. దీనికి తోడు, విదేశీ చదువుల కోసం కేరళ నుంచి ఏటా రూ.43,378 కోట్లు బయటకు వెళ్లిపోతున్నాయి. అంటే లోపలికి వచ్చే ఆదాయంలో 20 శాతం మళ్ళీ విదేశాలకే చేరుతోంది. ఇది 'బ్రెయిన్ డ్రెయిన్'తో పాటు 'మనీ డ్రెయిన్'కు కూడా దారితీస్తోంది.
కొత్త ప్రభుత్వం ముందున్న 100 రోజుల పరీక్ష!
మే 4 తర్వాత బాధ్యతలు చేపట్టే ప్రభుత్వం మొదటి 100 రోజుల్లోనే తన సత్తా చాటాల్సి ఉంటుంది. ఆర్బీఐ విడుదల చేసే త్రైమాసిక నివేదికలు, కేరళ బ్యాంకుల్లోని ఎన్నారై డిపాజిట్ల ధోరణులు ఆ ప్రభుత్వానికి తొలి పరీక్షగా నిలవనున్నాయి. గల్ఫ్లో ఉపాధి కోల్పోయి తిరిగివచ్చే కార్మికుల కోసం ప్రత్యేక ప్యాకేజీలను ప్రకటించడం, మౌలిక సదుపాయాల బోర్డు (KIIFB) ద్వారా నిధులను సమర్థవంతంగా ఖర్చు చేయడం వంటి కఠిన నిర్ణయాలు తీసుకోవాల్సి ఉంటుంది. మొత్తానికి, కేరళ భవిష్యత్తు ఇప్పుడు ఇరాన్ యుద్ధ గమనంపై మరియు కొత్తగా వచ్చే పాలకులు తీసుకునే యుద్ధ ప్రాతిపదిక నిర్ణయాలపై ఆధారపడి ఉంది.
Click it and Unblock the Notifications
Sign in with Google