రేప్ వ్యాఖ్యలపై దుమారం: వెనక్కి తగ్గని ములాయం
ములాయం సింగ్ తన వ్యాఖ్యలను వెనక్కి తీసుకుని, క్షమాపణ చెప్పాలని కాంగ్రెసు, బిజెపి డిమాండ్ చేశాయి. ఓ సీనియర్ నేత అటువంటి వ్యాఖ్యలు చేయడం అభ్యంతరకరమే కాకుండా విచాకరమూ సిగ్గు చేటు అని కాంగ్రెసు నేత మీం అఫ్జల్ అన్నారు. తన హృదయంలో ములాయం సింగ్కు ఎంతపాటి గౌరవం ఉందో వ్యాఖ్యల వల్ల అర్థమవుతోందని అన్నారు.
ఉత్తరప్రదేశ్ ప్రభుత్వం ములాయం మార్గదర్శకత్వంలో నడుస్తోందని, అటువంటి స్థితిలో ములాయం వ్యాఖ్యలు కుర్రాళ్లకు తప్పుడు సంకేతాలు ఇస్తుందని అఫ్జల్ అన్నారు. ములాయం సింగ్ వ్యాఖ్యలను ఆర్జెడి చీఫ్ లాలూ ప్రసాద్ యాదవ్ వ్యతిరేకించారు. ములాయం సింగ్ పట్టాలు తప్పారని ఆయన అన్నారు. తాను ఏం మాట్లాడుతున్నాననే విషయం కూడా ములాయంకు తెలియడం లేదని ఆయన అన్నారు.
ములాయం సింగ్ వ్యాఖ్యలు సిగ్గుచేటు అని, ములాయం వెంటనే క్షమాపణ చెప్పాలని బిజెపి నేత ముక్తార్ అబ్బాస్ నక్వీ అన్నారు. సున్నితమైన విషయాలతో ములాయం రాజకీయం చేస్తున్నారని, ఆ విధమైన నాయకుల తీరును భారత్ క్షమించదని ఆయన అన్నారు.
ఆ వ్యాఖ్యలపై బిజెపి నాయకురాలు స్మృతి ఇరానీ ప్రతిస్పందిస్తూ - కేంద్రంలో ములాయం సింగ్ యాదవ్ ప్రభుత్వాన్ని ఏర్పాటు చేయబోవడం లేదని అన్నారు. ములాయం సింగ్ అత్యాచార దోషులను కాపాడడానికి చట్టాన్ని మార్చాలనుకుంటే తనవంటివారు అడ్డుకుంటారని ఆమె అన్నారు.