బీహార్ దర్బార్: ఆర్జేడీ ఎంఎల్ఏ మీద కేసు

పాట్నా: బీహార్ లో అధికారంలోకి వచ్చిన వెంటనే మహాకూటమిలోని ఆర్జేడీ శాసన సభ్యుడు రెచ్చిపోయాడు. ఓ పోలీస్ స్టేషన్ కు ఫోన్ చేసి అక్కడి అధికారిని తీవ్రస్థాయిలో హెచ్చరించి చివరికి చిక్కుల్లో పడ్డాడు.

పోలీసులు సదరు శాసన సభ్యుడి మీద కేసులు నమోదు చేసి విచారణ చేస్తున్నారు. భోజ్ పూర్ జిల్లా లోని చార్ పోఖ్రి పోలీస్ స్టేషన్ ఎస్ హెచ్ఓ (స్టేషన్ హౌస్ ఆఫీసర్) కున్వర్ గుప్తా తన పై అధికారులకు ఫిర్యాదు చేశారు.

బర్హరా శాసన సభ నియోజక వర్గం నుంచి సరోజ్ యాదవ్ ఇటివల ఆర్జేడీ నుంచి పోటీ చేసి గెలుపొందారు. ఈయన చార్ పోఖ్రి పోలీస్ స్టేషన్ కు ఫోన్ చేసి పోలీసు అధికారి కున్వర్ గుప్తాతో మాట్లాడారు. మీ పోలీస్ స్టేషన్ పరిధిలోని ఓ గ్రామంలో జరిగిన జంట హత్యల కేసు ఏమైయ్యింది అని ప్రశ్నించారు.

ఇద్దరు హత్యకు గురైతే మీరెందుకు కేసు నమోదు చెయ్యలేదని ప్రశ్నించారు. మీరు ఇదే విధంగా ప్రవర్తిస్తే తమ పని తాము చేసుకుని వెలుతామని, తరువాత పరిస్థితులు వేరుగా ఉంటాయని ఎంఎల్ఏ సరోజ్ యాదవ్ హెచ్చరించారని జిల్లా ఎస్పీ నవీన్ చంద్ర ఝూ అన్నారు.

స్టేషన్ హౌస్ అధికారి కున్వర్ గుప్తా ఫిర్యాదు మేరకు తాము శాసన సభ్యుడు సరోజ్ యాదవ్ మీద వివిధ సెక్షన్ల కింద కేసు నమోదు చేసి విచారిస్తున్నామని ఎస్పీ నవీన్ చంద్ర ఝూ వివరించారు. అయితే ఎంఎల్ఏ సరోజ్ యాదవ్ మాత్రం తాను పోలీస్ స్టేషన్ కు ఫోన్ చెయ్యలేదని అంటున్నారు.

English summary

Bihar Police Taking a serious view of the threat call made by the RJD MLA, a case has been registered against him under relevant sections of law and a probe was on.