నిత్యానందకు లైంగిక పటుత్వ పరీక్షలు తప్పవు: సుప్రీం

న్యూఢిల్లీ: స్వామి నిత్యానందకు లైంగిక పటుత్వ పరీక్షలు జరగాల్సిందేనని సుప్రీంకోర్టు తేల్చి చెప్పింది. మహిళలపై లైంగిక దాడుల కేసుల్లో నిందితులకు లైంగిక పటుత్వ పరీక్షలు నిర్వహించడం తప్పనిసరి అని సుప్రీంకోర్టు స్పష్టం చేసింది. నిత్యానందకు లైంగిక పటుత్వ పరీక్షలు నిర్వహించడంలో జరుగుతున్న జాప్యం పట్ల అసంతృప్తి వ్యక్తం చేసింది. జాప్యం జరుగుతున్న కొద్దీ పరీక్షల్లో తప్పుడు ఫలితాలు వచ్చే ప్రమాదం ఉందని వ్యాఖ్యానించింది.

లైంగిక దాడుల కేసులు పెరుగుతున్న ప్రస్తుత వాతావరణంలో నిందితులకు లైంగిక పటుత్వ పరీక్షలు నిర్వహించడం కీలకంగా మారాయని చెప్పింది. లైంగిక దాడి కేసులో ఆరోపణలు ఎదుర్కుంటున్న వ్యక్తి పరీక్ష నుంచి తప్పించుకోజాలడని చెప్పింది.

2010లో నిత్యానంద ఓ మహిళపై లైంగిక దాడికి పాల్పడినట్లు ఆరోపణలు వచ్చాయి. లైంగిక పటుత్వ పరీక్షల నుంచి తనకు మినహాయింపు ఇవ్వాలని స్వామి నిత్యానంద పెట్టుకున్న దరఖాస్తును జస్టిస్ రంజనా ప్రకాష్ దేశాయ్ నేతృత్వంలోని సుప్రీంకోర్టు బెంచ్ తోసి పుచ్చింది. లైంగిక పరీక్షలంటే ఎందుకు అంతగా భయపడుతున్నారని సుప్రీంకోర్టు నిలదీసింది.

నిత్యానందకు లైంగిక పటుత్వ పరీక్షల నిర్వహణలో జాప్యం చేయడం పట్ల కోర్టు పోలీసులపై ఆగ్రహం వ్యక్తం చేసింది. ఇటువంటి పరీక్షల్లో జాప్యం జరిగితే వ్యతిరేక ఫలితాలు వచ్చి నిందితులు తప్పించుకునే ప్రమాదం ఉంటుందని అభిప్రాయపడింది.

English summary

The Supreme Court on Wednesday expressed displeasure over the “stalemate” in the case relating to sexual assault charges against self-styled godman Swamy Nithyananda, following his opposition to undergo potency test.