స్టీల్ సామ్రాజ్య పితామహుడు కన్నుమూత.. ప్రధాని మోదీ సంతాపం!

ప్రముఖ పారిశ్రామికవేత్త, ప్రసిద్ధ ఉక్కు దిగ్గజం, ఆర్సెలర్ మిట్టల్ ఎగ్జిక్యూటివ్ ఛైర్మన్ లక్ష్మీ మిట్టల్ తండ్రి మోహన్ లాల్ మిట్టల్(99) తుదిశ్వాస విడిచారు. భారతీయ పరిశ్రమల రంగానికి దిశానిర్దేశం చేసిన ఆయన జనవరి 15న లండన్‌లో కన్నుమూశారు. ఆయన వయస్సు 99 ఏళ్లు. రాజస్థాన్‌లోని ఓ చిన్న గ్రామం నుంచి మొదలైన ఆయన ప్రస్థానం ప్రపంచ ఉక్కు రంగంలో ఒక సుస్థిరమైన స్థానాన్ని సంపాదించుకుంది.

రాజస్థాన్ నుంచి ప్రపంచ యవనిక వరకు..
రాజస్థాన్‌లోని రాజ్‌గఢ్ అనే చిన్న గ్రామంలో సాధారణ కుటుంబంలో జన్మించిన మోహన్ లాల్ మిట్టల్ కఠిన శ్రమతో తన వ్యాపారాన్ని నిర్మించారు.
1952లో కోల్‌కతాలో ఓ మూతపడిన స్టీల్ మిల్లును తీసుకుని ఆయన తన ప్రయాణాన్ని ప్రారంభించారు. 1974లో భారత మార్కెట్‌లో ఆంక్షలు పెరగడంతో కొత్త అవకాశాల కోసం తన కుమారుడు లక్ష్మీ మిట్టల్‌ను ఇండోనేషియాకు పంపారు. అదే నేడు ప్రపంచవ్యాప్తంగా విస్తరించిన 'ఇస్పాత్ గ్రూప్','ఆర్సెలర్ మిట్టల్' సామ్రాజ్యానికి పునాదిగా నిలిచింది.

నిజమైన కర్మయోగి
ఆయన గురించి తెలిసిన వారు మోహన్ లాల్‌ను ఓ "నిజమైన కర్మయోగి" అని పిలుస్తారు. వ్యాపారంలో ఎన్ని సవాళ్లు ఎదురైనా కృంగిపోకుండా నిస్వార్థంగా కర్తవ్యాన్ని నిర్వహించడమే ఆయన ఫిలాసఫీ. తన పిల్లలు తన కంటే మెరుగ్గా ఎదగాలని, ఎప్పుడూ రిస్క్ తీసుకోవడానికి భయపడవద్దని ఆయన ప్రోత్సహించేవారు. యూరోపియన్ స్టీల్ కంపెనీ 'ఆర్సెలర్'ను కైవసం చేసుకునే క్రమంలో లక్ష్మీ మిట్టల్ తన తండ్రి ఇచ్చిన సలహాలే విజయానికి కారణమని తరచూ చెబుతుంటారు.

ప్రధాని మోదీ, ప్రముఖుల సంతాపం
మోహన్ లాల్ మిట్టల్ మృతి పట్ల ప్రధాని నరేంద్ర మోదీ విచారం వ్యక్తం చేశారు. "ఆయన పరిశ్రమల రంగంలోనే కాకుండా, భారతీయ సంస్కృతి, సమాజ సేవలో కూడా విశేషమైన సేవలందించారు" అని కొనియాడారు. వ్యాపారవేత్తగానే కాకుండా పలు స్వచ్ఛంద సంస్థల ద్వారా ఆయన చేసిన సామాజిక సేవలు ఎందరికో స్ఫూర్తిదాయకం.

Shri Mohan Lal Mittal Ji distinguished himself in the world of industry. At the same time, he was very passionate about Indian culture. He supported various philanthropic efforts, reflecting his passion for societal progress. Pained by his passing. I will cherish our various… pic.twitter.com/nLbZWkcWIQ

— Narendra Modi (@narendramodi) January 16, 2026