విపక్ష కూటమికి INDIA నామకరణం వెనుక ఇంత జరిగిందా ? వద్దన్న వారే చివరికి అలా..

దేశంలో వచ్చే ఏడాది జరిగే సార్వత్రిక ఎన్నికల్లో బీజేపీని దీటుగా ఎదుర్కొనేందుకు జట్టు కట్టిన 26 విపక్ష పార్టీలు రెండు రోజుల పాటు బెంగళూరులో చర్చలు జరిపాయి. ఈ చర్చల్లో ఓ విషయంలో అయితే పురోగతి సాధించాయి. అది విపక్ష కూటమికి ఇండియా పేరు పెట్టడం. అయితే విపక్షాల కూటమికి ఇండియా పేరు పెట్టడం వెనుక చాలా కథే నడిచినట్లు తెలిసింది. అనేక మలుపుల తర్వాత ఇండియా పేరు, దానికి ట్యాగ్ లైన్ ఖరారయ్యాయి.

ముందుగా విపక్షాల భేటీలో ఇండియా పేరును కాంగ్రెస్ అగ్రనేత రాహుల్ గాంధీ, బెంగాల్ సీఎం మమతా బెనర్జీ ఉమ్మడిగా ప్రతిపాదించినట్లు తెలుస్తోంది. అయితే బీహార్ సీఎం, ఈ ఫ్రంట్ కు సమన్వయ కర్త కాబోతున్న నితీశ్ కుమార్ మాత్రం దాన్ని వ్యతిరేకించారు. దీనికి కారణం INDIA ఇంగ్లీష్ పేరులో NDA మూడు అక్షరాలు ఉండటమేనట. దీంతోపాటు D అనే అక్షరానికి డెమోక్రాటిక్ అని పెడితే అచ్చంగా ఎన్డీయే పేరును కాపీ కొట్టేసినట్లే ఉంటుందని ఆయన తీవ్రంగా వ్యతిరేకించారు.

అయితే నితీశ్ అభ్యంతరం తర్వాత D అక్షరానికి పెడదామని అనుకున్న డెమోక్రాటిక్ పదానికి బదులుగా డెవలప్ మెంటల్ అనే పదం వచ్చి చేరింది. దీంతో పాటు మెజార్టీ నేతలు ఇండియా పేరునే అంగీకరించడంతో నితీశ్ చల్లబడ్డారు. మరోవైపు ఇండియా అనే ఇంగ్లీష్ పేరు మాత్రమే పెడితే బాగోదని, హిందీలో భారత్ అనే పదం కనీసం ట్యాగ్ లైన్ లో అయినా ఉండేలా చూడాలని మహారాష్ట్ర మాజీ సీఎం ఉద్ధవ్ థాక్రే సూచించారు. దీంతో ట్యాగ్ లైన్ లో భారత్ జీతేగా (భారత్ గెలవబోతోంది) అని పెట్టినట్లు తెలుస్తోంది.

అలాగే ఇండియా పేరు ఖరారు చేసిన విపక్షాల నేతలు.. దాన్ని ప్రజల్లోకి విస్తృతంగా తీసుకెళ్లాలని నిర్ణయించారు. వచ్చే ఎన్నికల్లోపు భారత్ అంతా ఇండియా పేరు మార్మోగాలని, దీన్ని వ్యతిరేకిస్తే ఇండియాను వ్యతిరేకించినట్లే అనే వాదనను కూడా విస్తృతంగా ప్రచారం చేయాలని నేతలు నిర్ణయించారు. అందుకు తగినట్లే విపక్షాల భేటీ ముగిశాక నిర్వహించిన ప్రెస్ మీట్లో సైతం రాహుల్ గాంధీ ఇండియా ఎప్పుడూ ఓడిపోలేదన్నారు. అటు మమత కూడా బీజేపీ.. ఇండియాను ఛాలెంజ్ చేస్తావా అని ప్రశ్నించారు.

English summary

26 opposition parties met in bengaluru for the last two days to discuss how to face bjp in 2024 polls have initially divided over its front's name INDIA and finally agreed on some changes.