2026 నాటికి రూ.500 నోట్లు కనిపించవా..?

Fact Check: సోషల్ మీడియాలో ప్రతి రోజూ ఎన్నో నకిలీ వార్తలు వైరల్ అవుతూ ఉంటాయి. అందులో ఏది నిజమో.. కాదో అని తెలుసుకోకుండానే చాలా మంది షేర్ చేస్తూనే ఉంటారు. వాటి కారణంగా చాలా మంది అయోమయంలో పడిపోతూ ఉంటారు. అలాంటి సందర్భంలో ప్రభుత్వం లేదా సంబంధిత అధికారులు స్పందించి ఫేక్ వార్తలను ఖండించి నిజాలను వెల్లడిస్తూ ఉంటారు. గత కొంతకాలంగా రూ.500 నోట్లపై జరుగుతున్న దుష్ప్రచారాన్ని కేంద్రం కొట్టిపారేసింది. దశలవారీగా రూ.500 నోట్లను ఆపేస్తారన్న ఊహాగానాలను కేంద్రం ఖండించింది. రూ.500 కరెన్సీ నోట్లను మార్చి 2026 నాటికి భారతీయ రిజర్వ్ బ్యాంక్(RBI) రద్దు చేయనుందని విస్తృతంగా ప్రచారంలో ఉన్న వాట్సాప్ సందేశాన్ని ప్రెస్ ఇన్ఫర్మేషన్ బ్యూరో(PIB) ఫేక్ అంటూ ప్రకటించింది. రూ.500 నోట్లను పంపిణీ చేయవద్దని ఆర్బీఐ ఎటువంటి ఆదేశాలు జారీ చేయలేదని.. ఈ కరెన్సీ చెల్లుబాటు అవుతుందని ప్రెస్ ఇన్ఫర్మేషన్ బ్యూరో స్పష్టం చేసింది.

వైరల్ మెసేజ్ ఏం చెప్పిందంటే?
సోషల్ ప్లాట్‌ఫామ్‌లలో విస్తృతంగా షేర్ చేయబడిన ఈ సందేశం తప్పుగా ఇలా పేర్కొంది. "ఆర్బీఐ అన్ని బ్యాంకులను సెప్టెంబర్ 30, 2025 నాటికి ఏటీఎంల నుంచి రూ.500 నోట్లను పంపిణీ చేయడాన్ని ఆపమని కోరింది. 75 శాతం ఏటీఎంలలో ఆ తర్వాత మార్చి 31, 2026 నాటికి 90 శాతం ఏటీఎంలలో రూ.200, రూ.100 నోట్లను మాత్రమే పంపిణీ చేయడం లక్ష్యం. కాబట్టి మీ చేతిలో ఉన్న రూ.500 నోట్లను విత్ డ్రా చేయడం ప్రారంభించండి." అంటూ తప్పుడు సందేశం షేర్ చేయబడింది. ఈ తప్పుదారి పట్టించే సందేశం ప్రజల్లో ఆందోళనను రేకెత్తించింది. చాలా మంది తమ రూ.500 నోట్లను మార్చుకోవడానికి పరిగెత్తారు.

రూ.500 నోట్లు నిలిపివేయడం లేదని.. ఆ నోట్లు చట్టబద్ధంగా మార్కెట్లో చెల్లుబాటు అవుతాయని పీఐబీ ఫ్యాక్ట్ చెక్ స్పష్టం చేసింది. సోషల్ మీడియాలో విస్తృతంగా ప్రచారం అవుతున్న ఇలాంటి తప్పుడు వార్తలను ప్రజలు నమ్మవద్దని విజ్ఞప్తి చేసింది. ఇలాంటి విషయాలను నమ్మడానికి, షేర్ చేయడానికి ముందు అధికారిక వర్గాల నుంచి నిజనిజాలు సరిచూసుకోవాలని పేర్కొంది.

ఈ పుకారుకు కారణం ఏమిటి?
ఈ గందరగోళం 2025 ఏప్రిల్‌లో జారీ చేయబడిన ఒక చట్టబద్ధమైన ఆర్బీఐ సర్క్యులర్ నుంచి ఉద్భవించి ఉండవచ్చు. ఇది బ్యాంకులు, వైట్ లేబుల్ ఏటీఎం ఆపరేటర్లు ఏటీఎంల ద్వారా రూ.100, రూ.200 నోట్ల లభ్యతను పెంచాలని ఆదేశించింది. అయితే ఈ సర్క్యులర్ రూ.500 నోట్లను దశలవారీగా తొలగించే ప్రణాళిక గురించి ఎటువంటి ప్రస్తావన చేయలేదు. చిన్న డినామినేషన్ నోట్ల లభ్యతను రోజువారీ ఉపయోగం కోసం పెంచడం ఆర్బీఐ లక్ష్యం. రూ. 500 నోట్లను పూర్తిగా తొలగించడం కాదు.

English summary

government has debunked rumors that Rs.500 currency notes will be phased out by 2026. A viral message claiming that Rs.500 notes would no longer be distributed by ATMs after September 2025 is fake.