బలపరీక్షకు ముందే సీఎం కుమారస్వామికి బీజేపీ వార్నింగ్: ఈ రోజు చెయ్యాలి, లేదంటే సినిమా!

Published: Friday, May 25, 2018, 12:53 [IST]

బెంగళూరు: శుక్రవారం మద్యాహ్నం కర్ణాటక ముఖ్యమంత్రిగా హెచ్.డి.కుమారస్వామి కర్ణాటక శాసన సభలో బలపరీక్షలో మెజారీ ఎమ్మెల్యే మద్దతుతో తన పదవిని కాపాడుకోవాలని ప్రయత్నిస్తున్న సందర్బంలో సీఎం కుమారస్వామి మా డిమాండ్లు ఈ రోజు తీర్చకపోతే రాష్ట్ర వ్యాప్తంగా ఆందోళన చేపడుతామని బీజేపీ హెచ్చరించింది. ఈ రోజు రైతుల రుణమాఫీ చెయ్యాలని బీఎస్. యడ్యూరప్ప సీఎం కుమారస్వామికి అల్టిమేటం జారీ చేశారు.

శాసన సభ సమావేశం

విధాన సౌధకు బయలుదేరే ముందు బీఎస్. యడ్యూరప్ప ప్రైవేటు హోటల్ దగ్గర మీడియాతో మాట్లాడారు. తాను అధికారంలోకి వచ్చిన వెంటనే రైతుల రుణమాఫీ చేస్తానని ఎన్నికల ప్రచారంలో జేడీఎస్ నేత హెచ్.డి. కుమారస్వామి ప్రజలకు హామీ ఇచ్చారని బీఎస్. యడ్యూరప్ప గుర్తు చేశారు.

మెజారిటీ లేదంట

సీఎంగా ప్రమాణస్వీకారం చేసిన తరువాత దేవాలయం దగ్గర మీడియాతో మాట్లాడిన హెచ్.డి. కుమారస్వామి జేడీఎస్ కు సంపూర్ణ మెజారిటీ లేనందున రైతుల రుణమాఫీ చెయ్యడం కష్టంగా ఉందని ఇదే హెచ్.డి. కుమారస్వామి చెప్పడం విడ్డూరంగా ఉందని యడ్యూరప్ప ఎద్దేవ చేశారు.

సీఎంకు బీజేపీ వార్నింగ్

శుక్రవారం శాసన సభలో బలపరీక్ష నిరూపించుకున్న వెంటనే రైతుల రుణమాఫీ చేస్తున్నామని జేడీఎస్-కాంగ్రెస్ పార్టీల సంకీర్ణ ప్రభుత్వం ప్రకటించాలని బీఎస్. యడ్యూరప్ప డిమాండ్ చేశారు. రైతుల రుణమాఫీ చెయ్యకపోతే రాష్ట్ర వ్యాప్తంగా ఆందోళనలు చేస్తామని బీఎస్. యడ్యూరప్ప హెచ్చరించారు.

సూట్ కేస్ ప్రభుత్వం

తన కుమారుడు పూర్తి కాలం అధికారంలో ఉండరని స్వయంగా సీఎం హెచ్.డి. కుమారస్వామి తల్లి చెప్పారని యడ్యూరప్ప ఆరోపించారు. అంతేకాకుండా సీఎం హెచ్.డి. కుమారస్వామి సొంత సోదరుడు హెచ్.డి. రేవణ్ణ కుమారుడు ప్రజ్వల్ సూట్ కేసు ఉన్నంత వరకే జేడీఎస్ ప్రభుత్వం అని చెప్పారని, ఇలాంటి పార్టీ అధికారంలోకి రావడంతో కన్నడిగులు తలదించుకుంటున్నారని యడ్యూరప్ప విమర్శించారు.

జేడీఎస్ ను కాంగ్రెస్ అంతం చేస్తోంది

జేడీఎస్ ను పూర్తిగా అంతం చెయ్యడానికి కాంగ్రెస్ పార్టీ సిద్దం అయ్యిందని బీఎస్. యడ్యూరప్ప ఆరోపించారు. ఆ విషయం గ్రహించలేని కుమారస్వామి సీఎం కుర్చిలో కుర్చోవడానికి సిద్దం అయ్యారని, రానున్న రోజుల్లో జేడీఎస్ పరిస్థితి ఎలా ఉంటుందో ఆ పార్టీ నాయకులకే తెలుస్తోందని బీఎస్. యడ్యూరప్ప జోస్యం చెప్పారు.

Published On May 25, 2018