యూపీ పర్యాటక స్ధలాల్లో ఎలక్ట్రికల్ వాహనాలకే అనుమతి-యోగీ సర్కార్ కీలక నిర్ణయం..

దేశంలోనే అతిపెద్ద రాష్ట్రమైన యూపీలో అభివృద్ధిని పరుగులు తీయిస్తున్న సీఎం యోగీ ఆదిత్యనాథ్.. అదే సమయంలో ఎలక్ట్రికల్ వాహనాల వినియోగాన్నీ పెంచేందుకు తీవ్రంగా ప్రయత్నిస్తున్నారు. ఇప్పటికే రాష్ట్రాన్ని కాలుష్య రహితంగా మార్చేందుకు ప్రభుత్వ వాహనాల్ని సైతం ఎలక్ట్రికల్ వాహనాలుగా మార్చేందుకు ప్రయత్నాలు ప్రారంభించిన యోగీ.. ఇప్పుడు పర్యాటక స్ధలాలకు వెళ్లేందుకు విద్యుత్ వాహనాల్ని ప్రోత్సహిస్తున్నారు.

ప్రపంచ పర్యాటక దినోత్సవం సందర్భంగా సీఎం యోగి ఆదిత్యనాథ్ రాష్ట్రవ్యాప్తంగా ఉన్న ముఖ్య పర్యాటక ప్రాంతాలలో ప్రత్యేకంగా ఎలక్ట్రిక్ వాహనాలను (ఇ-బస్సులు, ఇ-రిక్షాలు) ప్రవేశపెట్టే కార్యక్రమాన్ని ప్రారంభించారు. ఈ ప్రాంతాల్లో ఎలక్ట్రిక్ వాహనాలకు మాత్రమే అనుమతి ఉంటుందని, సంప్రదాయ డీజిల్, పెట్రోల్ వాహనాలను క్రమంగా తొలగించాలని యోగీ ఆదిత్యనాథ్ తెలిపారు. ఈ పర్యావరణ అనుకూల పర్యాటక ప్రయత్నంలో పాలుపంచుకోవాలని ముఖ్యమంత్రి ప్రైవేట్ ఆపరేటర్లను ప్రోత్సహించనున్నారు.

యోగిరాజ్ బాబా గంభీర్‌నాథ్ ఆడిటోరియంలో జరిగిన ఓ కార్యక్రమంలో సీఎం యోగి ఆదిత్యనాథ్ ఉత్తరప్రదేశ్ పర్యాటక సామర్థ్యాన్ని ప్రదర్శించే ఎగ్జిబిషన్‌ను ప్రారంభించారు. అదే సమయంలో ఆయన పర్యాటకం కోసం సమగ్ర "A to Z" గైడ్‌బుక్‌ను ప్రారంభించారు. ఈ సందర్భంగా యోగీ.. యూత్ టూరిజం క్లబ్ సభ్యులకు కిట్‌లను పంపిణీ చేసి, పర్యాటక రంగంలోని వ్యక్తుల సహకారాన్ని ప్రశంసించారు.

ఈ సంవత్సరం ప్రపంచ పర్యాటక దినోత్సవం సందర్భంగా "పర్యాటకం మరియు గ్రీన్ ఇన్వెస్ట్‌మెంట్" అనే థీమ్ ను యూపీ ప్రభుత్వం ప్రకటించింది. జనరేటర్ వినియోగాన్ని నిలిపివేయడం, సోలార్ లైటింగ్ అమలు చేయడం వంటి చర్యల్ని ప్రభుత్వం ప్రోత్సహిస్తోంది. ఆధ్యాత్మిక పర్యాటక రంగంలో ఉత్తరప్రదేశ్ ప్రపంచ నాయకత్వాన్ని యోగీ ఈ సందర్భంగా ప్రస్తావించారు. టూరిజం కేవలం మార్పుకు ఉత్ప్రేరకం కాదని, కొత్త జీవన విధానానికి గేట్‌వే అని యోగీ అన్నారు.ప్రధాన పర్యాటక ప్రదేశాలలో ఎలక్ట్రిక్ వాహనాలను మాత్రమే అనుమతించడం ద్వారా గ్రీన్ పద్ధతులను అవలంబించడంలో ప్రైవేట్ ఆపరేటర్లను ప్రోత్సహించే ప్రణాళికలను ఆయన వివరించారు.

English summary

Yogi Adityanath launches Electric Vehicle initiative For Key Tourist Spots in UP