Exit Polls: కాబోయే ప్రధాని ఎవరు? నెతన్యాహు ఔట్? 1999 తర్వాత అత్యధిక పోలింగ్.

మధ్యప్రాచ్యంలో మరోసారి భారీ రాజకీయ అనిశ్చితి నెలకొంది. తీవ్ర ఉత్కంఠ నడుమ ముగిసిన ఇజ్రాయెల్ పార్లమెంట్ (కెనెసెట్) సాధారణ ఎన్నికల్లో ఏ ఒక్క పార్టీకి, కూటమికి స్పష్టమైన మెజారిటీ దక్కే అవకాశం కనిపించడం లేదు. సుదీర్ఘకాలంగా ప్రధానిగా వ్యవహరిస్తున్న బెంజమిన్ నెతన్యాహు కూటమికి, ఆయనను వ్యతిరేకిస్తున్న ప్రతిపక్ష రంగానికి సరిసమానంగా స్థానాలు వస్తాయని ఎగ్జిట్ పోల్స్ వెల్లడించడంతో అధికారం ఎవరికి దక్కుతుందనేది తీవ్ర ఆసక్తికరంగా మారింది.

హోరాహోరీగా ఎగ్జిట్ పోల్స్ ఫలితాలు!

ఓటింగ్ ముగిసిన అనంతరం విడుదలైన వివిధ ఛానెళ్ల ఎగ్జిట్ పోల్ అంచనాలు ఇజ్రాయెల్ రాజకీయాన్ని మరింత వేడెక్కించాయి. ప్రముఖ కన్-11 (Kan 11) ఎగ్జిట్ పోల్ ప్రకారం.. ప్రధాని నెతన్యాహు మద్దతుదారుల కూటమికి 51 సీట్లు, ఆయన ప్రత్యర్థి కూటమికి కూడా సరిగ్గా 51 సీట్లు వస్తాయని అంచనా వేసింది. ప్రభుత్వ ఏర్పాటుకు అవసరమైన 61 సీట్ల మార్కును దాటడంలో రెండు వర్గాలు విఫలమయ్యాయని సదరు సర్వే పేర్కొన్నట్లు ఏఎన్ఐ వార్తా సంస్థ తెలిపింది.

అయితే 'డైరెక్ట్ పోల్స్' అంచనా ప్రకారం నెతన్యాహు వర్గానికి 55 సీట్లు, గాడి ఐసన్‌కోట్ నేతృత్వంలోని ప్రతిపక్ష కూటమికి 49 సీట్లు వస్తాయని తెలిసింది. మరోవైపు ఛానెల్ 14 ప్రసారం చేసిన ఫిల్‌బర్ పోల్ మాత్రం నెతన్యాహు కూటమికి 60 సీట్లు వచ్చే అవకాశముందని, మెజారిటీకి కేవలం ఒక్క సీటు దూరంలో ఆగిపోతుందని పేర్కొంది.

కింగ్‌మేకర్లుగా మారనున్న అరబ్ పార్టీలు!

ఏ కూటమికి కూడా సొంతంగా 61 స్థానాల స్పష్టమైన మెజారిటీ రాకపోవడంతో, పార్లమెంట్‌లో సుమారు 16 నుంచి 18 స్థానాలు సాధించే అవకాశం ఉన్న అరబ్ పార్టీలు ఇప్పుడు అత్యంత కీలకంగా మారాయి. కింగ్‌మేకర్‌గా మారిన 'రామ్' (Ra'am) పార్టీ అధ్యక్షుడు మన్సూర్ అబ్బాస్ ఏఎన్ఐతో మాట్లాడుతూ.. తమతో ఇటు నెతన్యాహు వర్గం, అటు ప్రతిపక్ష వర్గం రెండూ సంప్రదింపులు జరుపుతున్నాయని వెల్లడించారు. ప్రభుత్వం స్థిరంగా పనిచేసే అవకాశం ఉంటే గాడి ఐసన్‌కోట్ నేతృత్వంలోని ప్రభుత్వంలో చేరడానికి తమకు ఎలాంటి అభ్యంతరం లేదని ఆయన స్పష్టం చేశారు. అయితే విపక్షాల్లోని కొన్ని జియోనిస్ట్ గ్రూపులు అరబ్ పార్టీలతో కలవడానికి మొగ్గు చూపకపోవడం రాజకీయం ఊహించని టర్న్ తీసుకుంది.

పోలింగ్ రికార్డు.. ప్రజల్లో పెరిగిన చైతన్యం!

అక్టోబర్ 7, 2023న హమాస్ జరిపిన మెరుపు దాడి తర్వాత దేశంలో జరిగిన తొలి సాధారణ ఎన్నికలు కావడంతో ప్రజలు భారీ ఎత్తున ఓటింగ్‌లో పాల్గొన్నారు. మంగళవారం రాత్రి పోలింగ్ కేంద్రాలు మూసే సమయానికి ఏకంగా 77.7 శాతం ఓటింగ్ నమోదైంది. గత 2022 ఎన్నికల్లో నమోదైన 70.6 శాతంతో పోలిస్తే ఇది చాలా ఎక్కువ. 1999 తర్వాత ఇజ్రాయెల్ చరిత్రలోనే ఇది అత్యధిక ఓటింగ్ శాతంగా రికార్డుకెక్కింది.

నెతన్యాహుకు గట్టి పోటీ.. ముందేం జరగబోతోంది?

గత 19 ఏళ్లుగా ఇజ్రాయెల్ రాజకీయాధికారంలో కీలక పాత్ర పోషిస్తున్న నెతన్యాహుకు, ఈసారి మాజీ ఆర్మీ చీఫ్ గాడి ఐసన్‌కోట్, ఆయన 'యాషర్' పార్టీ నుంచి గట్టి పోటీ ఎదురైంది. జాతీయ భద్రత, ప్రజాస్వామ్య వ్యవస్థల రక్షణే ప్రధాన అజెండాగా సాగిన ఈ ఎన్నికల్లో చిన్న పార్టీలు కనీస ఓటింగ్ శాతం (3.25%) సాధించలేక పార్లమెంట్ రేసు నుంచి తప్పుకోవడం నెతన్యాహు కూటమి అవకాశాలను కొంత దెబ్బతీసింది. ప్రస్తుత పరిస్థితి చూస్తుంటే ఇజ్రాయెల్‌లో కొత్త ప్రభుత్వం కొలువుదీరుతుందా లేక మళ్లీ పొత్తుల డ్రామాలు నడిచి మరోసారి ఎన్నికల వైపు వెళ్తుందా అనేది రాబోయే రెండు రోజుల్లో తేలనుంది.

English summary

Israel election exit polls project a political deadlock as Benjamin Netanyahu's bloc and the opposition remain tied, falling short of the 61-seat majority in the Knesset.