లైంగిక వేధింపులు: అలస్కా ఎయిర్లైన్స్ తీరుపై జుకర్బర్గ్ సోదరి ఆగ్రహం
న్యూయార్క్: సామాన్యులకే కాదు, ప్రముఖులకు కూడా వేధింపులు తప్పడం లేదు. తాజాగా, ఫేస్బుక్ అధినేత మార్క్ జుకర్ బర్గ్ సోదరికి జరిగిన లైంగిక వేధింపుల ఘటన వెలుగులోకి వచ్చింది. ఈ విషయం ఆమే స్వయంగా వెల్లడించారు.
విమానంలో ప్రయాణిస్తున్న సమయంలో ఓ వ్యక్తి తనను వేధిస్తుంటే అలాస్కా ఎయిర్లైన్స్ సిబ్బంది ఏమాత్రం పట్టించుకోలేదని జుకర్బర్గ్ సోదరి రాండీ జుకర్బర్గ్ ఆరోపించారు. ఈ విషయాన్ని రాండీ ట్విట్టర్ ద్వారా వెల్లడించారు.
తాగి అసభ్యంగా..
ప్రస్తుతం రాండీ ఫేస్బుక్ మార్కెటింగ్ డైరెక్టర్గా విధులు నిర్వహిస్తున్నారు. ఇటీవల ఆమె అలాస్కా ఎయిర్లైన్స్కి చెందిన విమానంలో మెక్సికోకు ప్రయాణించారు. ఆ సమయంలో తన పక్క సీటులో ఉన్న ఓ ప్రయాణికుడు తాగి ఆమెతో అసభ్యంగా ప్రవర్తించాడు.
సిబ్బందికి చెబితే..
ఈ విషయంపై సిబ్బందికి ఫిర్యాదు చేస్తే అతను తరచూ ఈ విమానంలో ప్రయాణిస్తుంటాడని ఏమీ పట్టించుకోవద్దని చెప్పి వెళ్లిపోయారట. దీంతో దాదాపు మూడు గంటల పాటు ఆ వ్యక్తి తనను వేధించినట్లు రాండీ వెల్లడించారు.
సిబ్బంది తీరుపై రాండీ ఆగ్రహం
ఆ తర్వాత అలాస్కా ఎయిర్ కార్పొరేట్ స్టాఫ్కు ఈ విషయాన్ని వివరిస్తూ మెయిల్ చేసినట్లు చెప్పారు. ఈ మెయిల్లో అలస్కా విమాన సిబ్బంది తీరుపై ఆమె ఆగ్రహం వ్యక్తం చేశారు.
సిబ్బంది వైఖరి దారుణం.. సంస్థ స్పందించింది..
పైగా ఆ వ్యక్తితో విమాన సిబ్బంది జోకులు వేసుకుంటూ అడిగినంత మద్యం ఇస్తూనే ఉన్నారని రాండీ ఆరోపించారు. దీనిపై అలాస్కా సంస్థ ప్రతినిధి ఎగన్ స్పందిస్తూ.. రాండీ పట్ల జరిగిన ఘటనపై పూర్తి స్థాయిలో దర్యాప్తు చేపడతామని హామీ ఇచ్చారు.