మూసుకుంటున్న లిఫ్ట్ తలుపులు.. వాటి మధ్యలో చిన్నారి
ఓ అపార్ట్ మెంట్ లో లిప్ట్ తలుపులు అప్పుడే మూసుకోబోతున్నాయి.. అనుకోకుండా ఓ చిన్నారి తప్పటడుగులు వేసుకుంటూ ఆ తలుపుల మధ్యకు వెళ్లి నిలబడింది.
మలేసియా: ఓ అపార్ట్ మెంట్ లో లిప్ట్ తలుపులు అప్పుడే మూసుకోబోతున్నాయి.. అనుకోకుండా ఓ చిన్నారి తప్పటడుగులు వేసుకుంటూ ఆ తలుపుల మధ్యకు వెళ్లి నిలబడింది. లిఫ్ట్ తలుపులకు సెన్సార్లు కూడా లేవు.. ఆ తరువాత ఏం జరిగుంటుంది?
ఊహించుకోవడానికే భయం వేసే ఈ ఘటన మలేసియాలోని ఓ అపార్ట్ మెంట్ లో నిజంగా జరిగింది. మలేసియాలోని బాటు ఉబన్ లోని సన్నీపాయింట్ కాంప్లెక్స్ లో నివసిస్తున్న సన్నిహితులను కలిసేందుకు ఓ మహిళ తన మూడేళ్ల కుమార్తెను వెంటతీసుకుని వెళ్లింది.
ఈ క్రమంలో ఆ చిన్నారి ఆడుకుంటూ లిఫ్ట్ వద్దకు చేరుకుంది. అప్పుడే లిఫ్ట్ తలుపులు తెరుచుకున్నాయి. అభం శుభం తెలియని ఆ చిన్నారి లోపలికి వెళ్లేందుకు ప్రయతిస్తూ ఉన్నట్లుండి మధ్యలోనే ఆగింది. అప్పుడు పాప సరిగ్గా తలుపుల మధ్యన ఉంది.
దూరం నుండి ఈ దృశ్యం చూసిన ఆ చిన్నారి తల్లికి పైప్రాణాలు పైనే పోయాయి. సరిగ్గా అప్పుడే లిఫ్ట్ తలుపులు మూసుకోబోతున్నాయి. పైగా ఆ లిఫ్ట్ తలుపులకు సెన్సార్లు కూడా లేవు. ఆ పాప తల్లి పరుగు పరుగున వచ్చింది. లిఫ్ట్ ఒక తలుపును గట్టిగా చేతితో పట్టుకుని.. మరో పక్క నుంచి పాపను కాలితో గట్టిగా అవతలికి తన్నింది.
దీంతో ఆ చిన్నారి విసురుగా పక్కకి పడడం... సరిగ్గా అదేసమయంలో లిఫ్ట్ తలుపులు మూసుకోవడం రెండూ ఒకేసారి జరిగిపోయాయి. ఆ తల్లి తన కుమార్తెను తీసుకుని బతుకుజీవుడా అనుకుంటూ అక్కడ్నించి వెళ్లిపోయింది.