555 డ్రోన్లతో పగ తీర్చుకున్న ఉక్రెయిన్ .. తగలబడుతున్న మాస్కో..!
రష్యా, ఉక్రెయిన్ దేశాల మధ్య రగులుతున్న యుద్ధం మరింత భీకర రూపం దాల్చింది. ఉక్రెయిన్ సాయుధ దళాలు రష్యా రాజధాని మాస్కోను లక్ష్యంగా చేసుకుని ప్రతీకార రీతిలో భారీ డ్రోన్ దాడులకు తెగబడ్డాయి. ఈ దాడుల్లో మాస్కో నగర శివార్లలో ఉన్న ఒక ప్రధాన చమురు శుద్ధి కర్మాగారం తీవ్రంగా దెబ్బతింది. అక్కడ భారీగా మంటలు చెలరేగాయి. ఈ షాకింగ్ ఘటనతో అప్రమత్తమైన రష్యా అధికారులు రక్షణ చర్యలు చేపట్టారు.
ఈ భారీ దాడి కారణంగా మాస్కోలోని అంతర్జాతీయ విమానాశ్రయం భద్రతా కారణాల దృష్ట్యా విమాన సర్వీసులను తాత్కాలికంగా నిలిపివేసింది. అలాగే చమురు కర్మాగారానికి సమీపంలో ఉండే నగర రింగ్ రోడ్డుపై రద్దీని అదుపు చేయడానికి వాహనాల రాకపోకలను నిలిపివేసినట్లు రష్యా అంతర్గత వ్యవహారాల మంత్రిత్వ శాఖ వెల్లడించింది. రాత్రి పూట తాము సుమారు 555 ఉక్రేనియన్ డ్రోన్లను విజయవంతంగా అడ్డుకుని కూల్చివేసినట్లు రష్యా రక్షణ వర్గాలు ప్రకటించాయి.
దాడి తీవ్రతను వివరిస్తూ మాస్కో మేయర్ సెర్గీ సోబ్యానిన్ మాట్లాడారు. తమ వైమానిక రక్షణ వ్యవస్థలు శత్రు డ్రోన్లను తిప్పికొట్టేందుకు తీవ్రంగా శ్రమించినప్పటికీ, కొన్ని డ్రోన్లు లక్ష్యాన్ని చేరుకుని చమురు కర్మాగారాన్ని తాకాయని చెప్పారు. ఈ దాడి వల్ల సమీపంలో ఉన్న ఒక షాపింగ్ మాల్ కూడా పాక్షికంగా దెబ్బతిందని ఆయన వివరించారు. కీవ్ నగరంపై రష్యా క్షిపణులతో దాడులు చేసిన కొద్ది గంటల్లోనే ఈ ప్రతిదాడి జరగడం గమనార్హం.
మా ప్రతీకారం సమర్థనీయం: జెలెన్ స్కీ
ఈ దాడుల బాధ్యతను ఉక్రెయిన్ అధ్యక్షుడు వోలోడిమిర్ జెలెన్స్కీ అధికారికంగా ధృవీకరించారు. తమ స్వంత నగరాలు, పౌరులపై రష్యా నిరంతరం కురిపిస్తున్న క్షిపణుల వర్షానికి ఈ ప్రతిదాడి పూర్తిగా సమర్థనీయమైన సమాధానమని ఆయన స్పష్టం చేశారు. ఈ వారంలో మాస్కో చమురు కర్మాగారాన్ని తమ సైన్యం లక్ష్యంగా చేసుకోవడం ఇది రెండోసారి అని ఆయన గుర్తుచేశారు. ఈ దాడులు రష్యా యుద్ధ యంత్రాంగానికి గట్టి ఎదురుదెబ్బ అని ఆయన అభివర్ణించారు.
రష్యాతో పాటు సరిహద్దుల్లోని రోస్టోవ్ రీజియన్, అలాగే ప్రస్తుతం రష్యా ఆధీనంలో ఉన్న ఉక్రెయిన్ భూభాగాల్లోని శత్రువుల కీలక స్థావరాలను కూడా తమ సైన్యం విజయవంతంగా దెబ్బతీసిందని జెలెన్స్కీ సోషల్ మీడియా వేదికగా వెల్లడించారు. తమ రక్షణ బలగాలు, నిఘా విభాగాలు ఉమ్మడిగా ప్రణాళికాబద్ధంగా జరిపిన సమన్వయ దాడుల ఫలితమే ఇదని ఆయన కొనియాడారు. రష్యా ఆర్థిక వ్యవస్థను, యుద్ధ వనరులను నిలిపివేయడానికి ఈ రకమైన వ్యూహాత్మక దాడులు ఎంతో అవసరమని పేర్కొన్నారు.
రష్యాను దౌత్య మార్గంలోకి తీసుకురావడానికి ఇటువంటి బలమైన ప్రతిఘటనలు దోహదపడతాయని ఉక్రెయిన్ భావిస్తోంది. అంతర్జాతీయ భాగస్వాములు సైతం ఉక్రెయిన్ దాడుల కచ్చితత్వాన్ని, ప్రభావాన్ని గుర్తించారని జెలెన్ స్కీ వ్యాఖ్యానించారు. అయితే, పరస్పర దాడులతో ఇరు దేశాల సరిహద్దుల్లో భయానక వాతావరణం నెలకొంది. ఈ పరిణామాలు యుద్ధం త్వరలోనే ముగుస్తుందన్న ఆశలను సన్నగిల్లేలా చేస్తూ, మరింత ఉద్రిక్తతలకు దారితీస్తున్నాయి.
Click it and Unblock the Notifications
Sign in with Google