వైరల్ వీడియో : పుతిన్ తో భేటీ తర్వాత కిమ్ డీఎన్ఏ తుడిచేసిన సెక్యూరిటీ..!

తన చిత్ర విచిత్రమైన నిర్ణయాలు, విధానాలు, లైఫ్ స్టైల్ తో ప్రపంచవ్యాప్తంగా నిత్యం వార్తల్లో నిలిచే ఉత్తర కొరియా అధ్యక్షుడు కిమ్ జోంగ్ ఉన్ తాజాగా ఇలాంటిదే ఓ పని చేసి చర్చనీయాంశమయ్యారు. చైనా రాజధాని బీజింగ్లో నిర్వహించిన మిలిటరీ పరేడ్ కు ఉత్తర కొరియా రాజధాని పాంగ్యాంగ్ నుంచి ఓ ప్రైవేటు రైలులో బయలుదేరి ఒక రోజు ఆలస్యంగా గమ్యానికి చేరుకున్న కిమ్.. ఆ తర్వాత చైనా, రష్యా అధ్యక్షులు షీ జిన్ పింగ్, వ్లాదిమీర్ పుతిన్ తో భేటీ అయ్యారు.

ఈ భేటీల సందర్భంగా మరో ఆసక్తికర పరిణామం చోటు చేసుకుంది. రష్యా అధ్యక్షుడు వ్లాదిమీర్ పుతిన్ తో ఉత్తర కొరియా అధ్యక్షుడు కిమ్ జోంగ్ ఉన్న భేటీ అయ్యారు. ఈ భేటీలో పలు విషయాలపై వారు చర్చించుకున్నారు. అనంతరం ఎవరికి వారు బయలుదేరి వెళ్లిపోయారు. అయితే ఈ భేటీ ముగిసిన తర్వాత అసలు విషయం జరిగింది. కిమ్ భద్రతా సిబ్బంది వీరిద్దరి భేటీ జరిగిన చోటుకు వెంటనే వాలిపోయారు.

⚡️After Kim Jong-un’s meeting with Putin, his team thoroughly wiped the chair and table he use, reportedly to remove any possible DNA traces.

- Kremlin reporter Alexander Yunashev pic.twitter.com/6ZeWfPLh1Z

— War Intel (@warintel4u) September 3, 2025

కిమ్ జోంగ్ ఉన్ కూర్చొన్న కుర్చీని హడావిడిగా తుడిచేయడం ప్రారంభించారు. దీంతో వీరు ఎందుకిలా చేస్తున్నారో కాసేపు ఎవరికీ అర్దం కాలేదు. అయితే ఆ తర్వాత అసలు విషయం తెలిసింది. కిమ్ జోంగ్ ఉన్ డీఎన్ఏ ఆధారాలు ఆయన కూర్చొన్న కుర్చీలో లేకుండా చేసేందుకే వారు ఇలా చేశారని తెలిసింది. తద్వారా కిమ్ భద్రత విషయంలో, ఆయన డీఎన్ఎ శాంపిల్స్ విషయంలో ఆయన భద్రతా సిబ్బంది ఎంత జాగ్రత్తగా ఉంటారో మరోమారు ప్రపంచానికి తెలిసింది. అదే సమయంలో భద్రతా సిబ్బంది ఇలా కిమ్ కూర్చొన్న కుర్చీని తుడుస్తున్న వీడియో కూడా ప్రపంచవ్యాప్తంగా వైరల్ అవుతోంది.