మోడీపై విశ్వాసం ఉంచండి: తెలంగాణ ప్రజలకు అమిత్ షా పిలుపు

హైదరాబాద్: ప్రధాని నరేంద్ర మోడీ సారథ్యంలో దేశం అన్ని రంగాల్లో అభివృద్ధి పథంలో దూసుకెళుతోందని కేంద్ర హోంమంత్రి అమిత్ షా అన్నారు. వచ్చే 50 ఏళ్లలో ప్రపంచంలోనే భారత్ కీలక పాత్ర పోషించబోతోందన్నారు. మంగళవారం సాయంత్రం హైదరాబాద్‌లోని ఇంపీరియల్ గార్డెన్స్‌లో మేధావులతో నిర్వహించిన సమావేశంలో అమిత్ షా మాట్లాడారు.

అనేక రంగాల్లో భారతదేశం అగ్రస్థానానికి చేరబోతోందని అన్నారు అమిత్ షా. మోడీ నాయకత్వంలో దేశం ప్రగతిపథంలో దూసుకుపోతోందని తెలిపారు. బీజేపీ సిద్ధాంతాల ఆధారంగా నడిచే పార్టీనని.. బీఆర్​ఎస్‌​కు ఏం విధానం ఉందో చెప్పాలని ప్రశ్నించారు. బీఆర్​ఎస్​ కుటుంబ పార్టీనని.. కేటీఆర్‌​ను సీఎం చేయడం తప్ప కేసీఆర్‌​కు మరో విధానం అన్నదే లేదని అమిత్​ షా విమర్శించారు.

కుటుంబ, అవినీతి పార్టీ చేతుల్లో రాష్ట్రాన్ని పెట్టొద్దని అమిత్​ షా తెలంగాణ ప్రజలను అమిత్ షా కోరారు. మజ్లిస్‌​తో దోస్తీ కారణంగానే తెలంగాణ విమోచన దినోత్సవాన్ని కేసీఆర్​ నిర్వహించలేదన్నారు అమిత్ షా. కేంద్రం రెండేళ్లుగా తెలంగాణ విమోచన దినోత్సవ వేడుకలు నిర్వహిస్తోందని చెప్పారు. నీళ్లు, నిధులు, నియామకాలపైనే తెలంగాణ పోరాటం జరిగిందన్నారు.

కాళేశ్వరం ప్రాజెక్టు పేరుతో వేల కోట్లు దోచుకున్నారని అమిత్ షా ఆరోపించారు. మోడీ సర్కార్​ తెలంగాణకు తొమ్మిదేళ్లలో 9 లక్షల కోట్ల రూపాయలను ఇచ్చిందని అన్నారు. రాష్ట్రానికి కేసీఆర్​ ఏం చేశారని.. ఇక్కడి ప్రజలు అడుగుతున్నారన్నారు. తెలంగాణ ప్రజలను ఓటు అడిగే హక్కు కేసీఆర్‌​కు లేదన్నారు.

ఇది అమృత కాలం.. సంకల్పం తీసుకోవాల్సిన కాలమని అమిత్ సా చెప్పారు. బీజేపీ హయాంలో 12 కోట్ల మందికి ఇళ్లు నిర్మించి ఇచ్చామని తెలిపారు. మోడీ ప్రభుత్వం 9 కోట్ల మందికి గ్యాస్​ కనెక్షన్లు ఇచ్చిందన్నారు అమిత్ షా. నరేంద్ర మోడీ నేతృత్వంలోనే కొవిడ్‌​ను సమర్థవంతంగా ఎదుర్కొన్నామని స్పష్టం చేశారు. కొవిడ్​ వ్యాక్సిన్లను రాహుల్​ గాంధీ ఎద్దేవా చేశారని మండిపడ్డారు. డిజిటల్​ పేమెంట్ల వ్యవస్థను దేశవ్యాప్తం చేసిన ఘనత మోడీకే దక్కుతుందన్నారు అమిత్ షా.

The BRS government is a total letdown for the people of Telangana. The state has failed to optimize the opportunities given by the center to develop. Telangana people have understood that forming a BJP government is the only way to break the vicious cycle.
Spoke at the… pic.twitter.com/HC4K68Y0UU

— Amit Shah (@AmitShah) October 10, 2023

బీఆర్​ఎస్​ ప్రభుత్వ స్టీరింగ్​ ఎంఐఎం చేతుల్లో ఉందని అమిత్ షా అన్నారు. తెలంగాణలో కాషాయ జెండా ఎగరబోతోందని ధీమా వ్యక్తం చేశారు. కాంగ్రెస్​, బీఆర్​ఎస్​ నాటకాలు ఆడుతున్నాయని.. మోడీపై భరోసా ఉంచి ఈసారి తెలంగాణలో అవకాశం ఇవ్వాలని అమిత్​ షా తెలంగాణ ప్రజలను కోరారు. అంతకు ముందు ఆదిలాబాద్‌​లో జరిగిన బీజేపీ జనగర్జన సభలో అమిత్ షా పాల్గొని ప్రసంగించిన విషయం తెలిసిందే. ఈ సభలోనూ బీఆర్ఎస్ సర్కారుపై విమర్శలు గుప్పించారు.

English summary

Amit Shah speech in telangana bjp professionals and intellectuals meet.