Charminar Express: చార్మినార్ ఎక్స్ ప్రెస్ లో కీలక మార్పు..! ఫిబ్రవరి 3 నుంచి ఇలా..!

తెలంగాణ నుంచి ఏపీ మీదుగా తమిళనాడుకు ప్రయాణించే చార్మినార్ ఎక్స్ ప్రెస్ (charminar express)ప్రయాణికులకు దక్షిణ మధ్య రైల్వే ఓ అలర్ట్ జారీ చేసింది. ఈ రైలు ప్రయాణాల్లో ఓ కీలక మార్పు చేసింది. ఈ మార్పు ఫిబ్రవరి 3వ తేదీ నుంచి అమల్లోకి రాబోతోంది. చెన్నై ఎగ్మోర్ స్టేషన్ లో జరుగుతున్న అభివృద్ధి పనుల కారణంగా ఈ మార్పు చేసినట్లు రైల్వే అధికారులు ఇవాళ ఎక్స్ లో ఓ ప్రకటన పోస్ట్ చేశారు. దీంతో చార్మినార్ ఎక్స్ ప్రెస్ లో ప్రయాణించే వారు ఈ మార్పును గమనించాల్సి ఉంటుంది.

వాస్తవానికి చార్మినార్ సూపర్ ఫాస్ట్ ఎక్స్ ప్రెస్ హైదరాబాద్ నుంచి తమిళనాడులోని తాంబరం వరకూ ప్రయాణాలు సాగిస్తుంటుంది. అయితే చెన్నై ఎగ్మోర్ స్టేషన్ లో జరుగుతున్న అభివృద్ది పనుల కారణంగా ఈ రైలును తాంబరం స్టేషన్ వరకూ కాకుండా తాత్కాలికంగా చెన్నై బీచ్ రైల్వే స్టేషన్ వరకే పరిమితం చేశారు. దీంతో హైదరాబాద్ నుంచి వివిధ స్టేషన్ల మీదుగా ఈ రైలులో ప్రయాణాలు చేసే వారు తమ టికెట్లను చెన్నై బీచ్ స్టేషన్ వరకే బుక్ చేసునేందుకు అవకాశం ఉంటుంది.

హైదరాబాద్ నుంచి బయలుదేరే చార్మినార్ ఎక్స్ ప్రెస్ రైలు నంబర్ 12760 ఫిబ్రవరి 3 నుంచి ఏప్రిల్ 4వ తేదీ వరకూ చెన్నై బీచ్ వరకూ మాత్రమే ప్రయాణాలు సాగిస్తుందని రైల్వే అధికారులు తెలిపారు. ఈ రైలు చెన్నై బీచ్ కు ఉదయం 7 గంటలకు చేరుకుంటుంది. అలాగే తాంబరం స్టేషన్ కు బదులుగా చెన్నై బీచ్ నుంచి బయలుదేరే చార్మినార్ ఎక్స్ ప్రెస్ నంబర్ 12759 మార్పు ఫిబ్రవరి 4 నుంచి అమల్లోకి వచ్చి ఏప్రిల్ 5 వరకూ ఉంటుంది. ఈ రైలు చెన్నై బీచ్ నుంచి సాయంత్రం 6.20కు బయలుదేరుతుందని అధికారులు తెలిపారు.