తెలంగాణలో 17 లోక్‌సభ స్థానాలకు కాంగ్రెస్ ఇంఛార్జీల నియామకం: రేవంత్ సహా వీరికే బాధ్యతలు

తెలంగాణ అసెంబ్లీ ఎన్నికల్లో ఘన విజయం సాధించి రాష్ట్రంలో ప్రభుత్వాన్ని ఏర్పాటు చేసిన కాంగ్రెస్ పార్టీ.. ఇప్పుడు లోక్‌సభ ఎన్నికలపై దృష్టి సారించింది. ఈ క్రమంలోనే తెలంగాణలోని మొత్తం 17 లోక్‌సభ నియోజకవర్గాలకు ఇంఛార్జీలను ఆ పార్టీ నియమించింది. అసెంబ్లీ ఎన్నికల్లో పార్టీ గెలుపులో కీలక పాత్ర పోషించిన వారికి ఈ బాధ్యతలు అప్పించింది. ఇంఛార్జీలుగా నియమితులైన వారిలో ముఖ్యమంత్రిపాటు దాదాపు అందరూ మంత్రులే ఉండటం గమనార్హం,.

సీఎం, టీపీసీసీ చీఫ్ రేవంత్ - చేవెళ్ల, మహబూబ్‌నగర్
భట్టి విక్రమార్క - సికింద్రాబాద్, హైదరాబాద్
జూపల్లి కృష్ణారావు - నాగర్‌కర్నూల్
ఉత్తమ్ కుమార్ రెడ్డి - నల్గొండ
కోమటిరెడ్డి వెంకట్ రెడ్డి - భువనగిరి
కొండా సురేఖ - వరంగల్

పొంగులేటి శ్రీనివాస్ రెడ్డి - మహబూబాబాద్, ఖమ్మం
సీతక్క - ఆదిలాబాద్
దుద్దిళ్ల శ్రీధర్ బాబు - పెద్దపల్లి
పొన్నం ప్రభాకర్ - కరీంనగర్
జీవన్ రెడ్డి - నిజామాబాద్
పీ సుదర్శన్ రెడ్డి - జహీరాబాద్
దామోదర రాజనర్సింహ - మెదక్
తుమ్మల నాగేశ్వర రావు -మల్కాజిగిరి

ఇది ఇలావుండగా, వచ్చే లోక్‌సభ ఎన్నికల్లో తెలంగాణ నుంచి కాంగ్రెస్ అగ్రనేత సోనియా గాంధీని పోటీ చేయించాలని రాష్ట్ర పార్టీ తీర్మానం చేసింది. గాంధీభవన్‌లో సోమవారం కాంగ్రెస్ రాజకీయ వ్యవహారాల కమిటీ సమావేశం జరిగింది. 5 అంశాల ఎజెండాగా సాగిన పీఏసీ సమావేశంలో ఎన్నికల ఫలితాలు, 6 గ్యారంటీల అమలు, నామినేటెడ్ పోస్టులు, పార్లమెంట్ ఎన్నికల సన్నద్ధతపై చర్చించారు. ఇటీవల అసెంబ్లీ ఎన్నికల్లో హైదరాబాద్‌, రంగారెడ్డి జిల్లాల్లో సీట్లు తగ్గడంపైనా సమాలోచనలు చేసినట్లు సమాచారం.

ఈ సందర్భంగా వచ్చే లోక్‌సభ ఎన్నికల్లో ఏఐసీసీ అగ్ర నేత సోనియా గాంధీ తెలంగాణ నుంచి పోటీ చేయాలని పీఏసీ ఏకగ్రీవ తీర్మానం చేసింది. దీంతో పాటు గ్రామ సభలు పెట్టి అర్హులైన వారికి రేషన్ కార్డులు ఇస్తామని, వంద రోజుల్లో 6 గ్యారెంటీలు అమలు చేస్తామని తీర్మానించింది. అధికారం ఇచ్చిన తెలంగాణ ప్రజలకు కృతజ్ఞతలు తెలిపింది. తెలంగాణ కాంగ్రెస్ గెలుపునకు కృషి చేసిన ఏఐసీసీ నేతలకు ధన్యవాదాలు తెలిపింది.

కాంగ్రెస్ తెలంగాణ వ్యవహారాల ఇంఛార్జీ మాణిక్ ​రావు ఠాక్రే అధ్యక్షతన కొనసాగిన ఈ సమావేశంలో పీసీసీ చీఫ్, సీఎం రేవంత్ రెడ్డి, డిప్యూటీ సీఎం భట్టి విక్రమార్క, మంత్రులు తుమ్మల నాగేశ్వరరావు, ఉత్తమ్ ​కుమార్​ రెడ్డి, మాజీ ఎమ్మెల్యే జగ్గారెడ్డి, కాంగ్రెస్ కార్యనిర్వాహక అధ్యక్షులు, కమిటీ సభ్యులు పాల్గొన్నారు. కాంగ్రెస్ అధికారంలోకి వచ్చిన తర్వాత జరిగిన తొలి పీఏసీ సమావేశం కావడంతో ప్రాధాన్యత సంతరించుకుంది.

English summary

congress appointed in-charge for 17 lok sabha seats in telangana.