కేసీఆర్‌తో ఆ రాష్ట్ర సీఎం కీలక చర్చలు..!!

Published: Thursday, September 7, 2023, 23:48 [IST]

హైదరాబాద్: తెలంగాణలో అసెంబ్లీ ఎన్నికల గడువు సమీపిస్తోంది. పార్లమెంట్ ప్రత్యేక సమావేశాల్లో వన్ నేషన్, వన్ ఎలక్షన్ బిల్లును ప్రవేశపెడితే రాజకీయ ముఖచిత్రం సమూలంగా మారిపోతుంది. అసెంబ్లీ ఎన్నికలు 2024 వరకు వాయిదా పడే అవకాశాలు లేకపోలేదనే అభిప్రాయాలు ఉన్నాయి.

వన్ నేషన్- వన్ ఎలక్షన్ బిల్లుపై ప్రస్తుతానికి ఎలాంటి స్పష్టతా లేదు. దీన్ని పార్లమెంట్ ఉభయ సభల్లో ప్రవేశపెట్టిన తరువాతే.. తెలంగాణ సహా అయిదు రాష్ట్రాల అసెంబ్లీ ఎన్నికల వాయిదా పడొచ్చా? లేక షెడ్యూల్ ప్రకారమే కొనసాగుతాయా? అనేది తేలుతుంది. అప్పటివరకు తెలంగాణలో ఎవరి రాజకీయ కార్యకలాపాల్లో వారు మునిగిపోయారు.

యధాతథంగా షెడ్యూల్ ప్రకారమే ఈ అయిదు రాష్ట్రాల్లో అసెంబ్లీ ఎన్నికలను నిర్వహించాల్సిన పరిస్థితే తలెత్తితే మాత్రం అక్టోబర్/నవంబర్‌లల్లో నోటిఫికేషన్ వెలువడుతుంది. డిసెంబర్‌లో పోలింగ్, కౌంటింగ్ ప్రక్రియ ముగిసిపోతుంది. కొత్త ప్రభుత్వాలు ఏర్పాటవుతాయి. దీనికోసం అన్ని పార్టీలు రంగం సిద్ధం చేసుకుంటోన్నాయి.

ఈ పరిస్థితుల మధ్య మేఘాలయా ముఖ్యమంత్రి కన్రాడ్ సంగ్మా.. ఇవ్వాళ హైదరాబాద్‌కు వచ్చారు. తెలంగాణ ముఖ్యమంత్రి కేసీఆర్‌తో భేటీ అయ్యారు. ప్రగతి భవన్‌కు వచ్చిన సంగ్మాకు కేసీఆర్ సాదరంగా స్వాగతం పలికారు. తేనీటి విందుతో ఆతిథ్యం ఇచ్చారు. వారిద్దరూ భేటీ అయ్యారు. దేశ రాజకీయాలు, సమకాలీలన పరిస్థితులపై చర్చించారు.

సుమారు 40 నిమిషాల పాటు కేసీఆర్- సంగ్మా మధ్య చర్చలు సాగినట్లు చెబుతున్నారు. అనంతరం కేసీఆర్ ఆయనను శాలువాతో సన్మానించారు. మెమొంటో బహూకరించారు. సంగ్మాను స్వాగతం పలికిన వారిలో కేటీఆర్, హరీష్ రావు, ఎర్రబెల్లి దయాకర్ రావు, ఎమ్మెల్సీలు పల్లా రాజేశ్వర్ రెడ్డి, మధుసూదనాచారి, ఎమ్మెల్యే రోహిత్ రెడ్డి ఉన్నారు.

Published On September 7, 2023