విష ప్రచారాన్ని ప్రజలు నమ్మొద్దు.!ప్రధాని సభను సక్సెస్ చేద్దాం.!కేంద్రమంత్రి కిషన్ రెడ్డి పిలుపు.!

Published: Friday, July 7, 2023, 16:43 [IST]

వరంగల్/హైదరాబాద్: ప్రధాని నరేంద్ర మోడీ వరంగల్ సభను సక్సెస్ చేయాలని బీజేపీ రాష్ట్ర అధ్యక్షుడు, కేంద్ర మంత్రి జి. కిషన్ రెడ్డి తెలంగాణ ప్రజలకు పిలుపునిచ్చారు. ఈ రోజు శుక్రవారం ఉదయం భారీ కాన్వాయ్తో హైదరాబాద్ నుంచి వరంగల్ చేరుకున్న ఆయన.. భద్రకాళి అమ్మవారిని దర్శించుకున్నారు. అనంతరం ప్రధాని సభ జరిగే ఆర్ట్స్ కాలేజీ గ్రౌండ్లో ఏర్పాట్లను పరిశీలించిన అనంత అక్కడే మీడియాతో మాట్లాడారు. తెలంగాణలో రాబోయేది బీజేపీ ప్రభుత్వమేనని, అధికారంలొకి రాగానే వరంగల్ ఎయిర్ పోర్ట్ కు మొదటి ప్రాధాన్యత ఇస్తామన్నారు కిషన్ రెడ్డి.

కల్వకుంట్ల కుటుంబాన్ని ఫామ్హౌజ్కు పరిమితం చేస్తాం : రైల్వే మ్యానుఫ్యాక్చరింగ్ యూనిట్, జాతీయ రహదారుల నిర్మాణానికి ప్రధాని భూమి పూజ చేస్తారు. తెలంగాణలో అభివృద్ధి, సంక్షేమం, మౌలిక వసతుల కల్పనకు మోడీ ప్రభుత్వం కృషి చేస్తున్నదన్నారు కిషన్ రెడ్డి. తెలంగాణలో సీఎం చంద్రశేఖర్ రావు కుటుంబం ప్రజాధనాన్ని ఎలా దుర్వినియోగం చేస్తున్నారో చూస్తున్నామని, కల్వకుంట్ల కుటుంబాన్ని ఫామ్హౌజ్కు పరిమితం చేయాలన్నారు కిషన్ రెడ్డి. రాష్ట్ర అభివృద్ధి కోసం ఈసారీ బీజేపీని ఆశీర్వదించాలని ప్రధాని మోడీ కోరనున్నారని, మంత్రులు, ముఖ్యమంత్రి సచివాలయంకు పోయే పరిపాలన కావాలని, బీఆర్ఎస్, బీజేపీ ఎప్పుడూ కలిసిన దాఖలాలు లేవని, ఇతర పార్టీలు చేసే విష ప్రచారాన్ని ఎవరూ నమ్మొద్దని కిషన్ రెడ్డి పిలుపునిచ్చారు.

కాంగ్రెస్, బీఆర్ఎస్ రెండూ ఒకటే : కాంగ్రెస్, బీఆర్ఎస్ గతంలో అనేకసార్లు కలిశాయని, రాష్ట్రపతి ఎన్నిక సమయంలో కాంగ్రెస్ పార్టీకి మద్దతుగా చంద్రశేఖర్ రావు మాట్లాడిన విషయం గుర్తుంచుకోవాలన్నారు కిషన్ రెడ్డి. అవి రెండు బొమ్మ బొరుసు పార్టీలని, గతంలో 18 చోట్ల కాంగ్రెస్ గెలిస్తే..12 మంది బీరెస్ పార్టీలోకి జంప్ అయ్యారని, బీజేపీ మాత్రమే కుటుంబపాలనను అంతమొందించగలదన్నారు కిషన్ రెడ్డి. బీజేపీ మాత్రమే న్యాయమైన పాలన చేయగలదని, గత 9 ఏండ్లుగా మోడీ ప్రభుత్వం నీతివంతంగా పనిచేస్తుందని, మంచి ప్రభుత్వం తెలంగాణకు అందిస్తామని, చాలా ఏండ్ల తర్వాత భారత ప్రధానిగా మోడీ వరంగల్కు వస్తున్నారన్నారు కిషన్ రెడ్డి.

మోడీ ప్రభుత్వం పూర్తి అంకిత భావంతో పనిచేస్తుంది : వరంగల్ నుంచి హైదరాబాద్ వరకు సిమెంట్ రోడ్డు వేయించిన ఘనత ప్రధాని మోడీదన్నారు కిషన్ రెడ్డి. వరంగల్ జిల్లాకు టెక్స్టైల్ పార్క్ కేంద్రమే మంజూరు చేసిందన్నారు. వరంగల్ అభివృద్ధి విషయంలో మోడీ ప్రభుత్వం పూర్తి అంకిత భావంతో పనిచేస్తుందని, రైలు మ్యానుఫ్యాక్చరింగ్ పరిశ్రమలో భవిష్యత్లో రైలు ఇంజన్ సహా.. వ్యాగన్లు, కోచ్లు ఏమైనా తయారు చేసుకవచ్చన్నరు కిషన్ రెడ్డి. అనుకున్నదానికంటే పెద్ద పరిశ్రమనే కాజిపేటకు వచ్చిందని, బీజేపీ ప్రభుత్వం వచ్చిన తర్వాత వరంగల్ ఎయిర్పోర్టు అంశం కూడా పరిగణలోకి తీసుకుంటామన్నారు కిషన్ రెడ్డి.

కవిత అరెస్ట్ చూడాల్సిన పని బీజేపీది కాదు : కవిత అరెస్ట్ చూడాల్సిన పని బీజేపీది కాదని, సీబీఐ ఆ పని చేస్తుందన్నారు కిషన్ రెడ్డి. చంద్రశేఖర్ రావుది కమీషన్ల ప్రభుత్వమని, కుటుంబ వాటాలు, పెత్తనం లేని పరిపాలన తెలంగాణలో తీసుకువస్తామన్నారు కిషన్ రెడ్డి. మామునూర్ ఎయిర్ పోర్ట్ స్థలం విషయంలో తాను, తమ అధికారులు రాష్ట్రానికి ఎన్నోసార్లు లెటర్స్ రాశామన్నారు. తెలంగాణలో బీజేపీ ప్రభుత్వం రాగానే వరంగల్ యెయిర్ పోర్ట్ కు మొదటి ప్రాధాన్యత ఇస్తామన్నారు. ఎయిర్ జర్నీని బీజేపీ ప్రోత్సాహిస్తుందని, ఓరుగల్లు జనాలు మోడీ బహిరంగ సభను విజయవంతం చేయాలని కిషన్ రెడ్డి ప్రజలకు విజ్ఞప్తి చేసారు.

Published On July 7, 2023